O‘zbekiston Respublikasi Maktabgacha va maktab taʼlimi vazirligi

2025 yil 1 may kuni poytaxtimizdagi Yangi O‘zbekiston universitetida “Pedagog kadrlar tayyorlash tizimining transformatsiyasi – Yangi O‘zbekiston uchun sifatli ta’lim garovi” mavzusidagi xalqaro konferensiya bo‘lib o‘tdi.

Unda Maktabgacha va maktab ta’limi vaziri o‘rinbosari Sardor Rajabov, Cambridge Assessment, UNESCO, UNICEF, Britaniya Kengashlarining O‘zbekistondagi vakolatxonasi vakillari, Cambridge Universiteti va boshqa xalqaro ta’lim tashkilotlari ekspertlari, pedagog hamda soha mutaxassislari ishtirok etdi.

Qayd etilganidek, Davlatimiz rahbarining joriy yil 28 apreldagi “Pedagog kadrlar tayyorlash tizimini yanada takomillashtirish chora-tadbirlari to‘g‘risida” Farmoni asosida Nizomiy nomidagi Toshkent davlat pedagogika universiteti negizida Nizomiy nomidagi O‘zbekiston milliy pedagogika universiteti tashkil etilmoqda.

Shuningdek, respublikada pedagogika sohasida kadrlar tayyorlaydigan 13 ta oliy ta’lim tashkiloti Maktabgacha va maktab ta’limi vazirligi tizimiga o‘tkaziladi.

Yangi o‘quv yilidan boshlab bosqichma-bosqich Universitetning mavjud 14 ta fakulteti maqbullashtiriladi hamda yuridik shaxs bo‘lmagan 6 ta pedagogika oliy maktabi tashkil etiladi.

Yetakchi oliy ta’lim tashkiloti sifatida e’tirof etilayotgan mazkur Universitetning boshqaruv tizimi “Yangi O‘zbekiston” universiteti tajribasi asosida tubdan takomillashtiriladi hamda xalqaro ta’lim dasturlari bakalavriat ta’lim yo‘nalishlariga birinchi kursdan joriy etiladi.

Quvonarli jihati, xorijiy mutaxassislarni jalb qilgan holda dars berish uchun professor-o‘qituvchilarni tanlab olinadi.

Kutilayotgan yangi o‘quv yilidan boshlab pedagog kadrlarni tayyorlash shakli kunduzgi va kechki ta’lim shaklida olib boriladi, sirtqi ta’lim shakliga qabul amalga oshirilmaydi.

2026-2027 o‘quv yilidan alohida ta’lim ehtiyojlari bo‘lgan bolalarga ta’lim-tarbiya berishga qaratilgan  “Gospital pedagogika” magistratura mutaxassisligi yo‘lga qo‘yiladi.

Shuningdek, ushbu Farmon bilan pedagog kadrlar tayyorlash tizimining transformatsiyasi bosqichma-bosqich amalga oshiriladi.

Bunda Universitet dunyo reytingida yetakchi o‘rinda turgan Buyuk Britaniyaning Kembridj universiteti bilan o‘qituvchilarni tayyorlashning amaldagi dasturlarini ko‘rib chiqish, yangi o‘quv reja va dasturlarni ishlab chiqish bo‘yicha hamkorlik qiladi.

Hamkorlik doirasida Kembridj universitetining malakali mutaxassislaridan iborat xalqaro ekspertlar guruhi Universitet va pedagog kadrlar tayyorlaydigan barcha oliy ta’lim muassasalarini transformatsiya qilish bo‘yicha keng qamrovli tahlil o‘tkazadi.

Ushbu o‘rganishlar doirasida sohani rivojlantirish bo‘yicha kelgusi 5 yilga mo‘ljallangan hamkorlikdagi “Yo‘l xaritasi”ni tuzish rejalashtirilgan.

Konferensiya doirasida pedagog kadrlarni tayyorlash tizimini transformatsiya qilishga qaratilgan ushbu rejalarni amalga oshirish bo‘yicha ekspertlarning taklif va mulohazalari tinglandi.