O‘zbekiston Respublikasi Maktabgacha va maktab taʼlimi vazirligi

Bugun Maktabgacha va maktab taʼlimi vaziri Hilola Umarova boshchiligida joriy yil oʻtkaziladigan malaka sinovlarini tashkil etish, inklyuziv sinflari mavjud taʼlim maskanlari hamda “Jasorat maktab”lari faoliyati, “Iqtidor maktab ansambli” va “Turon” maktab teatri tanlovlarini oʻtkazish masalalariga doir “Vazir soati” boʻlib oʻtdi.

Videokonferensiya shaklida tashkil etilgan tadbirda vazir oʻrinbosarlari, vazirlik masʼullari, hududiy boshqarmalar, tizim tashkilotlari rahbarlari ishtirok etdi.

Vazir Hilola Umarova kun tartibidagi masalalarga atroflicha toʻxtalib oʻtar ekan, oʻtgan haftada Sirdaryo, Jizzax, Xorazm viloyatlari va Qoraqalpogʻiston Respublikasida olib borilgan oʻrganish natijalariga toʻxtalib oʻtdi.

Taʼkidlanganidek, pedagoglar va masʼullar bilan oʻtkazilgan uchrashuvlar davomida maktabgacha va maktab taʼlimi tizimini rivojlantirishga doir ijobiy oʻzgarishlar hamda mavjud muammolar muhokama qilindi.

Yigʻilishda joriy yil yanvar-iyun oylarida oʻtkaziladigan malaka sinovlariga texnik tayyorgarlik ishlari tilga olib oʻtildi hamda masʼullarga sinov joylarini tayyorlash va kompyuter jamlanmalarini uzluksiz ishlashini taʼminlash boʻyicha zarur topshiriqlar berildi.

Vazir inklyuziv sinflar mavjud taʼlim maskanlari faoliyatiga toʻxtalib oʻtar ekan, ayni vaqtda 947 ta maktabda 1 401 ta inklyuziv sinf tashkil etilib, ularda 1 948 nafar nogironligi boʻlgan bolalar jalb etilganligini qayd etdi.

Shuningdek, joriy yilning yanvar oyidan 208 ta bogʻchada tajriba-sinov tariqasida tashkil etilgan inklyuziv guruhlarga 606 nafar nogironligi boʻlgan maktabgacha yoshdagi bolalar qamrab olingan.

Ammo ayrim hududlardagi inklyuziv sinflar tashkil etilishi belgilangan maktablarga bolalar qabul jarayonlari tanqid ostiga olindi. Masʼullarga har bir hududda inklyuziv taʼlim joriy etilgan kamida 1 ta umumtaʼlim maktabini “toʻsiqsiz muhit” meʼyorlariga moslashtirish topshirigʻi berildi.

Yigʻilishda keyingi masala sifatida joylarda faoliyati yoʻlga qoʻyilishi rejalashtirilayotgan “Jasorat maktab”lari faoliyati tahlil etildi hamda 208 ta “Jasorat maktabi”ni yangi oʻquv yiliga qadar ochish moʻljallanayotganligi aytib oʻtildi.

Shuningdek, joriy yilgi “Iqtidor maktab ansambli” va “Turon” maktab teatri tanlovlarini oʻtkazish ishlari ham atroflicha muhokama qilindi. 7-apreldan start berilgan “Iqtidor maktab ansambli” tanlovining tuman (shahar) bosqichida maktablardan 8 890 ta jamoa (71 120 nafar oʻquvchi) ishtirok etmoqda.

Bellashuvlarning hududiy bosqichi joriy yilning 14-29-aprel kunlari, “Iqtidor maktab ansambli” va “Turon” maktab teatri tanlovlarining Respublika bosqichi iyun oyida Samarqand shahrida oʻtkaziladi.

Mazkur tanlovlarni yuqori saviyada oʻtkazish boʻyicha hududiy boshqarma rahbarlariga tegishli topshiriqlar berildi.

Vazir joriy yil oʻtkaziladigan PISA 2025 tadqiqotining asosiy sinov jarayonlariga tayyorgarlik ishlari haqida toʻxtalar ekan, shu yil aprel-may oylarida PIRLS 2026 tadqiqotining tajriba-sinov jarayonlari 30 ta maktabda tashkil etilishini aytib oʻtdi.

Mutasaddi xodimlarga ushbu maktablarda PIRLS 2026 tadqiqotini oʻtkazish boʻyicha barcha zarur sharoitlarni tashkil qilish, har bir maktabni oʻquvchilarning soniga nisabatan yana qoʻshimcha 3 ta kompyuter bilan taʼminlash boʻyicha koʻrsatmalar berildi.

Tadbir soʻnggida vazirlik masʼullari va hududiy boshqarma boshliqlarining kun tartibidagi mavzularga oid hisobotlari tinglandi.