“Ayollar daftari”ga kiritilgan 300 nafardan ortiq xotin-qizlar ishtirokida psixologik trening mashg‘ulotlari tashkil etildi
2026-07-15 15:00:00 / Yangiliklar
Bugungi kunda mamlakatimizda xotin-qizlarni har tomonlama qo‘llab-quvvatlash, ularning ijtimoiy faolligini oshirish hamda ruhiy salomatligini mustahkamlashga qaratilgan tizimli ishlar izchil amalga oshirilmoqda.
Shu maqsadda Maktabgacha va maktab ta’limi vazirligi huzuridagi O‘quvchilarni kasb-hunarga yo‘naltirish psixologik-pedagogik respublika tashxis markazi mutaxassislari tomonidan joriy yilning 10–11-iyul kunlari “Ayollar daftari”ga kiritilgan 300 nafardan ortiq xotin-qizlar ishtirokida psixologik trening mashg‘ulotlari tashkil etildi.
Yangi Namangan, To‘raqo‘rg‘on, Kosonsoy, Uychi, Norin, Uchqo‘rg‘on tumanlari hamda Namangan shahrida o‘tkazilgan mashg‘ulotlarda ishtirokchilarning shaxsiy rivojlanishi, ruhiy barqarorligini mustahkamlash, stressni boshqarish, muloqot ko‘nikmalarini rivojlantirish, o‘z imkoniyatlariga bo‘lgan ishonchni oshirish hamda hayotiy faolligini kuchaytirishga qaratilgan amaliy mashqlar va interaktiv usullardan foydalanildi.
Ishtirokchilar mutaxassis-psixologlar tomonidan psixologik maslahatlar olish bilan birga, turli guruh mashg‘ulotlari, muhokamalar va amaliy jarayonlarda faol ishtirok etdilar.