O‘zbekiston Respublikasi Maktabgacha va maktab taʼlimi vazirligi

Hurmatli maktabgacha va maktab taʼlimi tizimi xodimlari!

Qadrli pedagoglar, ota-onalar va aziz yurtdoshlar!

Barchamizga yaxshi maʼlum, korrupsiya — davlat va jamiyat taraqqiyoti, taʼlim sifati hamda fuqarolarning davlat idoralariga boʻlgan ishonchiga jiddiy putur yetkazuvchi xavfli illat. Shu maʼnoda aytish lozimki, korrupsiyaga qarshi kurashish nafaqat davlat organlari, balki har bir rahbar, xodim va fuqaroning fuqarolik burchidir.

Yurtimizda korrupsiyaning har qanday koʻrinishiga barham berish, davlat boshqaruvida ochiqlik, shaffoflik va hisobdorlikni taʼminlash, byurokratik toʻsiqlarni bartaraf etish hamda fuqarolarga qulay va sifatli davlat xizmatlarini koʻrsatish boʻyicha keng koʻlamli islohotlar amalga oshirilmoqda.

Xususan, maktabgacha va maktab taʼlimi tizimida ham korrupsiyaning oldini olish, korrupsiyaviy xavf-xatarlarni bartaraf etish hamda halollik tamoyillarini mustahkamlash boʻyicha izchil ishlar olib borilmoqda.

Jumladan, vazirlik tizimida “Korrupsiyasiz soha” loyihasi yoʻlga qoʻyilib, “Bir darcha” tamoyili asosida davlat xizmatlari bosqichma-bosqich toʻliq elektron shaklga oʻtkazilmoqda, inson omilini kamaytirishga qaratilgan raqamli yechimlar amaliyotga joriy etilmoqda.

Vazirlik tizimidagi “Situatsion markaz” orqali byudjet mablagʻlaridan samarali foydalanish va qonun buzilish holatlarining oldini olish boʻyicha zamonaviy monitoring tizimi yoʻlga qoʻyildi.

Shuningdek, manfaatlar toʻqnashuvining oldini olish, ochiqlik va shaffoflikni taʼminlash hamda ichki nazorat mexanizmlarini kuchaytirish boʻyicha tizimli choralar amalga oshirilmoqda.

Ammo ayrim taʼlim muassasalarida noqonuniy pul yigʻimlari, mansabdor shaxslar orasida oʻz xizmat vakolatini suiisteʼmol qilish, manfaatlar toʻqnashuvi, byurokratik toʻsiqlar hamda boshqa korrupsiyaviy holatlar hanuz uchrab turayotgani ham bor haqiqat.

Albatta, bu kabi har bir noxush holat vazirlik tomonidan alohida nazoratga olinadi hamda oʻrnatilgan tartibda zarur va tezkor chora koʻrib borilishi taʼminlanadi.

Hurmatli tizim xodimlari!

Sizlardan xizmat vazifalaringizni yuksak masʼuliyat, vijdon va halollik bilan bajarishingizni, qonunchilik talablariga qatʼiy rioya qilgan holda korrupsiyaning har qanday koʻrinishiga nisbatan murosasiz munosabatda boʻlishingizni soʻrayman.

Unutmang, hech qanday noqonuniy manfaat, sovgʻa, pul mablagʻi yoki boshqa koʻrinishdagi ragʻbat xizmat burchidan ustun boʻlishi mumkin emas. Har bir rahbar va xodim oʻzining shaxsiy namunasida halollik va xolislik tamoyillariga amal qilishi lozim.

Qadrli ota-onalar va fuqarolar!

Taʼlim tizimida korrupsiya va boshqa qonunbuzilish holatlariga qarshi kurashishda sizlarning ham faol fuqarolik pozitsiyangiz alohida ahamiyatga ega.

Agar Maktabgacha va maktab taʼlimi vazirligi, uning hududiy boʻlinmalari, tizim tashkilotlari yoki maktabgacha va maktab taʼlimi tashkilotlari xodimlarining korrupsiyaviy xatti-harakatlari, noqonuniy pul yigʻimlari, manfaatlar toʻqnashuvi yoki boshqa huquqbuzarlik holatlariga oid maʼlumotlarga ega boʻlsangiz, vazirlikning quyidagi aloqa kanallari orqali murojaat qilishingizni soʻraymiz:

"Ishonch telefoni": (71) 202-09-09

Telegram bot: @mmtv_anticorbot

Rasmiy sahifa: https://uzedu.uz/uz/page/korrupsiyaga-qarshi-kurashish

Virtual qabulxona: https://vazir.uzedu.uz/

Vazirga murojaat Telegram boti: @uzedu_vazirbot

Elektron pochta: info@uzedu.uz

Har bir murojaat belgilangan tartibda xolis va har tomonlama koʻrib chiqiladi va murojaatchilarning shaxsiga oid maʼlumotlarning maxfiyligi qonunchilik talablariga muvofiq toʻliq kafolatlanadi. Tasdiqlangan korrupsiyaviy holatlar yuzasidan aybdor shaxslarga nisbatan qatʼiy qonuniy choralar koʻriladi.

Aziz hamkasblar va hurmatli yurtdoshlar!

Ishonchim komilki, birgalikda halollik, ochiqlik, adolat va masʼuliyat tamoyillariga sodiq qolgan holda, taʼlim tizimida korrupsiyadan xoli, shaffof va zamonaviy boshqaruv tizimini yanada mustahkamlaymiz hamda farzandlarimiz uchun sifatli taʼlim muhitini yaratishga munosib hissa qoʻshamiz.