O‘zbekiston Respublikasi Maktabgacha va maktab taʼlimi vazirligi

Samarqandda “Z-avlod” forumi doirasida Maktabgacha va maktab ta’limi vaziri o‘rinbosari Farhod Boqiyev samarqandlik yoshlar bilan uchrashdi.
Uchrashuv davomida mamlakatimizda yoshlarga qaratilayotgan e’tibor, ular uchun yaratilayotgan keng imkoniyat va shart-sharoitlar haqida so‘z yuritildi. Farhod Boqiyev bugungi texnika va texnologiyalar jadal rivojlanayotgan, globallashuv jarayonlari tobora kuchayib borayotgan davrda yoshlar zamonaviy bilimlarni puxta egallab, turli sohalarda yuqori natijalarga erishayotganini alohida ta’kidladi.

Shu bilan birga, u milliy qadriyatlarimiz va an’analarimizni asrab-avaylash masalasiga ham to‘xtalib, ayrim qadriyatlarning yo‘qolib borishi xavotir uyg‘otayotganini qayd etdi. Vazir o‘rinbosari yoshlar nafaqat bilimli va raqobatbardosh bo‘lishi, balki milliy qadriyatlarga hurmat ruhida tarbiyalanishi, oilasiga mehrli, ota-onasini qadrlaydigan insonlar bo‘lib voyaga yetishi muhimligini ta’kidladi.
— Bugungi yoshlar bilim olish bilan bir qatorda o‘zligini, milliy qadriyatlarini ham unutmasligi kerak. Ota-onaga hurmat, oilaga mehr va milliy an’analarga sadoqat har bir yoshning hayot tamoyili bo‘lishi lozim, — dedi Farhod Boqiyev.

Tadbir davomida yoshlar bilan ochiq muloqot tashkil etilib, ularning taklif va fikrlari tinglandi. Uchrashuv so‘ngida vazir o‘rinbosari o‘quvchilarni ko‘proq kitob mutolaa qilishga chaqirib, kitob insonning ma’naviy va intellektual kamoloti uchun muhim manba ekanini ta’kidladi.
Shuningdek, u yoshlarga ota-onalariga bo‘lgan mehr va ehtiromini so‘zda ham izhor etib turish muhimligini eslatdi.
— Ota-onangizni yaxshi ko‘rishingizni har kuni ayting. Bu ular uchun eng katta baxt va kuch bag‘ishlovchi hislardan biridir, — dedi Farhod Boqiyev.
Mazkur uchrashuv yoshlarning ma’naviy-ma’rifiy dunyoqarashini boyitish, ularni milliy qadriyatlarga sodiq va bilimli avlod sifatida tarbiyalashga xizmat qildi.