O‘zbekiston Respublikasi Maktabgacha va maktab taʼlimi vazirligi

Maktabgacha va maktab taʼlimi vaziri Eʼzoza Karimova boshchiligida tizim faoliyatini yanada takomillashtirishga qaratilgan navbatdagi “Vazir soati” boʻlib oʻtdi.

Yigʻilish avvalida oʻz yakuniga yetgan fan olimpiadalarining Respublika bosqichi jarayonlari hamda navbatdagi mahalliy va xalqaro olimpiada bahslari atroflicha muhokama qilindi.

Taʼkidlanganidek, soʻngi yillarda fan olimpiadalarining nufuzi, saviyasi hamda ishtirokchilarga boʻlgan eʼtibor yanada oshib, oʻquvchilarimiz yuqori natijalarni qayd etmoqda.

Ilk marta Asosiy olimpiada gʻoliblariga medal berish tartibi hamda tajriba-sinov tariqasida fizika, kimyo, biologiya fanlaridan laboratoriya topshiriqlari joriy etildi. Bu esa yoshlar oʻrtasida ilm-fan, tadqiqot va izlanishlarga boʻlgan qiziqishni yanada kuchaytirmoqda.

Shunga koʻra, joriy yilning mart oyida Buxoro, Samarqand, Qashqadaryo, Surxondaryo viloyatlari hamda Toshkent shahrida fanlar kesimida oʻtkazilgan asosiy fan olimpiadasining respublika bosqichi ham qizgʻin jarayonlarga boy boʻldi.

Tadbirda oʻquv yili yakuniga qadar oʻtkaziladigan qator mahalliy olimpiadalar hamda 4 ta xalqaro olimpiada, shuningdek, tarixda ilk bor yurtimizda oʻtkazilishi rejalashtirilgan Xalqaro kimyo hamda Xalqaro informatika olimpiadalarini yuqori saviyada tashkil etish masalalari muhokama qilindi.

Yigʻilishda joriy yilning yanvar-iyun oylarida oʻtkaziladigan bahorgi attestatsiya jarayonlariga puxta tayyorgarlik koʻrish va uni yuqori saviyada tashkil etish masalalari ham masʼullar ishtirokida koʻrib chiqildi.

Xususan, tegishli tashkilotlar va mahalliy hokimliklar bilan hamkorlikda hududlarda malaka (test) sinovlari oʻtkaziladigan joylarni tayyorlash va u yerda munosib shart-sharoitlarni yaratish, qoʻshimcha kompyuterlar bilan taʼminlash, jarayonlarni yuqori saviyada va shaffof tashkil etish boʻyicha navbatdagi masalalar tilga olib oʻtildi.

Tadbirda Oʻzbekistonning xalqaro baholash dasturi (PIRLS)da ishtirokiga doir masalalar ham muhokama qilindi.

Aytilganidek, tadqiqotga tayyorgarlik koʻrish uchun mutaxassislar uchun treninglar, test.avloniy.uz platformasida test mashgʻulotlari tashkil etildi. Xususan, 11-14-mart kunlari asosiy sinov jarayonlariga puxta tayyorgarlik koʻrish maqsadida tanlab olingan 164 ta maktabning 4-sinf oʻquvchilari oʻrtasida “Oʻqish savodxonlari” tanlovi oʻtkazildi.

Shuningdek, 27-mart kuni tadqiqot doirasida 520 nafar maktab koordinatori va AKT mutaxassislari uchun trening tashkil etilib, tadqiqotda ularning roli hamda vazifalari xususida maʼlumotlar berib oʻtildi.

Tadqiqotning asosiy sinov jarayonlari Taʼlimdagi yutuqlarni baholash xalqaro assotsiatsiyasi (IEA) tomonidan joriy yil 13-apreldan 1-mayga qadar mamlakatimizdagi 164 ta maktabda boʻlib oʻtadi. Unda ushbu maktablarda taʼlim oluvchi jami 5 947 nafar 4-sinf oʻquvchisi ishtirok etadi.

Masʼullarga mazkur maktablarni oʻquvchilar soniga mos ravishda zamonaviy kompyuterlar va uzluksiz elektr taʼminoti, yuqori tezlikdagi internet bilan taʼminlash boʻyicha aniq vazifalar belgilab berildi.

Yigʻilishda Davlatimiz rahbarining 2025-yil 8-sentabrdagi “Maktabdan tashqari taʼlim tizimini yangi bosqichga olib chiqish chora-tadbirlari toʻgʻrisida”gi qarorida belgilangan muhim vazifalar  ijrosi muhokama qilindi.

Qayd etilganidek, mazkur qaror asosida oʻtgan davr mobaynida maktabdan tashqari taʼlim muassasalarining moddiy-texnik bazasini mustahkamlash, yangi toʻgaraklar tashkil etish, mavjudlarini zamonaviy yoʻnalishlar bilan boyitish borasida sezilarli ishlar amalga oshirildi.

Umumtaʼlim maktablarida maktab maslahatchisi lavozimi joriy etilib, ushbu lavozimga yuqori malakali, yetakchi mutaxassislarni saralash ishlari amalga oshirildi.

Hududlarda “Kelajak markazlari” tashkil etilib, ulardagi turli toʻgaraklarga oʻquvchilarni jalb qilish ishlari muntazam olib borilmoqda.

Masʼullarga maktab maslahatchisi lavozimi boʻyicha mavjud boʻsh oʻrinlar uchun yetakchilik qobiliyati va xalqaro sertifakatga ega nomzodlarni tavsiya etish, har bir umumtaʼlim maktabida “Kelajak” markazining tarmoq toʻgaraklarini tashkil etish boʻyicha muhim topshiriqlar berildi.

Tadbir soʻngida vazirlik masʼullari va hududiy boshqarma boshliqlarining kun tartibidagi mavzularga oid hisobotlari tinglandi.