O‘zbekiston Respublikasi Maktabgacha va maktab taʼlimi vazirligi

Maktabgacha va maktab taʼlimi vaziri Eʼzoza Karimova boshchiligida soha rivojini taʼminlashga qaratilgan kelgusi masalalar muhokamasiga bagʻishlangan navbatdagi “Vazir soati” boʻlib oʻtdi.
Unda vazir oʻrinbosarlari, vazirlik masʼullari, hududiy boshqarmalar, tizim tashkilotlari rahbarlari ishtirok etdi.
Tadbirda dastlab bolalar mehnatidan noqonuniy foydalanishni oldini olish boʻyicha amaldagi qonunchilik talablari ijrosini taʼminlash, bu boradagi profilaktik chora-tadbirlarni kuchaytirish masalasi atroflicha koʻrib chiqildi.
Masʼullarga bolalar huquqlarini himoya qilish boʻyicha davlat va jamoat tashkilotlari bilan hamkorlikni kuchaytirish, barcha boʻgʻin rahbarlarining bu boradagi shaxsiy javobgarligi va masʼuliyatini oshirish boʻyicha zarur topshiriqlar berildi.
Shundan soʻng taʼlim muassasalarida Navroʻz umumxalq bayrami tadbirlarini yuqori saviyada tashkil etish, milliy qadriyatlar va anʼanalarni keng targʻib qilgan holda turli madaniy va sport tadbirlarini oʻtkazish boʻyicha belgilangan rejalar tahlil qilindi.
Taʼkidlanganidek, mazkur vaqt davomida oʻquvchilar oʻrtasida mazkur bayram tarixi, mazmun-mohiyati va ahamiyatiga bagʻishlangan insholar tanlovi tashkil etiladi. Shuningdek, taʼlim tashkilotlarida “Xush kelibsan, Navroʻzim!” mavzusida bayram sayllari, oʻquvchilar ishtirokida hunarmandchilik koʻrgazmalari, milliy raqs, koʻy-qoʻshiq va sahna koʻrinishlari, folklor chiqishlar hamda milliy taomlar namoyishi oʻtkaziladi.
Mazkur tadbirlarni tashkil etishda xavfsizlik va sanitariya talablariga qatʼiy rioya etilishini taʼminlash, kam taʼminlangan oilalar, inklyuziv va uy taʼlimiga jalb etilgan oʻquvchilar, uzoq muddatli davolanishda boʻlgan bolalar hamda mehnat faxriylari holidan xabar olish boʻyicha mutasaddilarga muhim tavsiyalar berildi.
Yigʻilishda “Yashil makon” umummilliy loyihasi doirasida hududlarda koʻchat ekish tadbirlarini oʻtkazish, oʻquvchi-yoshlar ishtirokida “Mahallamga nihol ekaman!” aksiyasi, “Yangi daraxt – yangi nafas” respublika eko musobaqasi, maktablar oʻrtasida “Eng obod taʼlim muassasasi”, “Obod maktab” tanlovlarini oʻtkazish bilan bogʻliq masalalar muhokama qilindi.
Belgilangan mazkur vazifalarni oʻz vaqtida va sifatli amalga oshirish maqsadida joriy yilning 21-martidan 21-apreliga qadar soha doirasida “Ekologiya oyligi” deb eʼlon qilindi.
Tadbirda PIRLS xalqaro baholash tadqiqotini oʻtkazish uchun olib borilayotgan tayyorgarlik ishlari ham mutasaddilar ishtirokida koʻrib chiqildi.
Qayd etilganidek, PIRLS 2026 tadqiqotiga tayyorgarlik koʻrish maqsadida joriy yilning 11-14-mart kunlari tanlab olingan 164 ta maktabning 4-sinf oʻquvchilari oʻrtasida “Oʻqish savodxonlari” tanlovi oʻtkazilmoqda.
Tanlov natijalariga koʻra, har bir hududdan eng yuqori ball toʻplagan 42 nafar oʻquvchi oʻrnatilgan tartib asosida taqdirlanishi koʻzda tutilgan.
Masʼullarga mazkur sinov jarayonlariga puxta tayyorgarlik koʻrish hamda uni yuqori saviyada oʻtkazish boʻyicha muhim topshiriqlar berildi.
Tadbir soʻnggida vazirlik masʼullari va hududiy boshqarma boshliqlarining kun tartibidagi mavzularga oid hisobotlari tinglandi.