Maktabgacha va maktab ta’limi vaziri o‘rinbosari Temur Komilov Italiya Respublikasida tashkil etilgan qator hamkorlik uchrashuvlarida ishtirok etdi.

Milan shahrida Lombardiya mintaqasi ta’lim va mehnat vaziri Simona Tironi bilan uchrashuv bo‘lib o‘tdi.

Muzokaralar davomida ta’lim sohasidagi istiqbolli hamkorlik yo‘nalishlari muhokama qilindi.

Jumladan, iqtidorli maktab o‘quvchilarini Google akademiyasining qisqa muddatli ta’lim safariga yuborish loyihasi yuzasidan kelishuvlarga erishildi.

Turin shahrida BMT shafeligidagi Xalqaro mehnat tashkiloti uchun kadrlar tayyorlash xalqaro markazi direktori Andreas Klemmer bilan muzokaralar o‘tkazildi.

Uchrashuv yakunlariga ko‘ra, vazirlikning moliya sohasida faoliyat yuritayotgan mutaxassislarining mazkur markazda malaka oshirish kurslarida ishtirok etishi hamda maxsus o‘quv dasturini ishlab chiqishga kelishib olindi.

SIOI prezidenti Riccardo Sessa bilan uchrashuv o‘tkazildi.

Uchrashuv davomida SIOI rahbariyati Rim shahrida yosh diplomatlar uchun tashkil etilgan kurslarda ishtirok etgan o‘zbekistonlik maktab o‘quvchilarining bilim olishga bo‘lgan intilishini alohida ta’kidladi.

O‘zbek tomoni tashabbusi bilan amaldagi kelishuvni kengaytirish hamda vazirlik tizimidagi tashkilotlar va oliy ta’lim muassasalarining xalqaro aloqalar bo‘limlari xodimlari uchun qo‘shimcha maxsus kurs tashkil etish bo‘yicha kelishuvga erishildi.

Shuningdek, II O‘zbekiston–Italiya rektorlar forumi doirasida Italiyaning qator nufuzli oliy ta’lim muassasalari rektorlari bilan uchrashuvlar o‘tkazildi.

Jumladan, Università degli Studi Roma Tre rektori Massimiliano Fiorucci bilan muloqot bo‘lib o‘tdi.

Oliy ta’lim muassasalarida pedagogik ta’lim yo‘nalishida hamkorlikni yo‘lga qo‘yish, shuningdek bakalavriat bosqichi uchun qo‘shma (double degree) dasturlarini amalga oshirish bo‘yicha kelishuvga erishildi.