O‘zbekiston Respublikasi Maktabgacha va maktab taʼlimi vazirligi

Bugun Maktabgacha va maktab ta’limi vaziri E’zoza Karimova boshchiligida sohaga doir kelgusida amalga oshirilishi lozim bo‘lgan qator masalalar tahliliga bag‘ishlangan “Vazir soati” bo‘lib o‘tdi.

Yig‘ilishda dastlab Davlatimiz rahbarining “Maktabgacha taʼlim va tarbiya tizimini yanada takomillashtirish chora-tadbirlari toʻgʻrisida”gi Farmonida belgilangan muhim vazifalar ijrosini ta’minlash, bu borada zarur normativ-huquqiy hujjatlarni tayyorlash masalalari mas’ullar ishtirokida ko‘rib chiqildi.

Shu bilan birga, bolalarni maktabga tayyorlov tizimini yanada takomillashtirish, bu yo‘nalishda ta’lim sifatini oshirish uchun mavjud imkoniyatlardan to‘liq foydalanish bo‘yicha aniq rejalar belgilab olindi.

Aytilganidek, bugungi kunda 6 yoshli bolalarning 98 foizi maktabga tayyorlovga qamrab olingan bo‘lib, bu ko‘rsatkichni 2026-yil so‘nggiga qadar 99 foizga, 2027-yilda 100 foizga yetkazish ko‘zda tutilgan.
Tadbirda Farmonda keltirilgan qator masalalar, xususan “Yangi avlod” bog‘chalari tarmog‘ini tashkil etish, ta’lim va ijtimoiy soha ob’yektlarida maktabga tayyorlov guruhlari faoliyatini yo‘lga qo‘yish, zamonaviy o‘quv-metodik qo‘llanma va didaktik materiallar bilan boyitish, pedagoglar salohiyatini yanada oshirish bo‘yicha navbatdagi vazifalar belgilab olindi.
Yig‘ilishda yurtimiz maktablarining Xalqaro baholash dasturi (PIRLS)da ishtirokiga doir muhim ishlar ham atroflicha ko‘rib chiqildi.
Ta’kidlanganidek, joriy yilning aprel-may oylarida mamlakatimizdagi tanlab olingan 164 ta maktabda PIRLS 2026 tadqiqotining asosiy sinov jarayonlari o‘tkaziladi.
Shu maqsadda ushbu sinovlarga puxta tayyorgarlik ko‘rish, pedagoglar ishtirokida trening mashg‘ulotlarini doimiy tashkil etib borish ishlari tahlil etildi. 
Shuningdek, tadqiqot o‘tkaziladigan maktablarni zamonaviy kompyuterlar hamda tezkor internet qurilmalari bilan ta’minlashga doir mas’ullarga zarur topshiriqlar berildi.
Tadbirda yana bir muhim masala — joriy yilning yanvar-fevral oylarida tashkil etiladigan malaka sinov jarayonlari hamda asosiy sinovlarga tayyorgarlik ishlari ham mas’ullar ishtirokida tahlil etildi.
Qayd etilganidek, ayni kunlarda malaka sinovlarida qatnashish bo‘yicha pedagoglarning murojaatlari qabul qilinmoqda hamda mazkur jarayonlar 1 mart kuniga qadar davom etadi.
Mas’ullarga ushbu murojaatlarni o‘z vaqtida ko‘rib chiqish va qabul qilish ishlarini sifatli tashkil etish, sinov o‘tkaziladigan binolarni qo‘shimcha tarzda zamonaviy kompyuterlar bilan ta’minlash bo‘yicha aniq vazifalar belgilandi.
Shuningdek, yig‘ilishda “Yil o‘qituvchisi” tanlovining ikkinchi bosqich jarayonlarini tashkil etish va baholash jarayonlarini belgilangan tartibda o‘tkazish, natijalarni umumlashtirgan holda tanlov Tashkiliy qo‘mitasiga taqdim etish zarurligi qayd etildi.
Tadbirda har yili an’anaviy tarzda o‘tkazib kelinayotgan “Turon maktab teatri” respublika tanloviga doir muhim masalalar ham ko‘rib chiqildi.
Ta’kidlanganidek, joriy yilning 2-6 mart kunlari tanlovning tuman (shahar), 1-8 aprel kunlari hududiy hamda iyun oyida Respublika bosqichi o‘tkazilishi rejalashtirilgan.
Mas’ullarga tanlov jarayonlarini yuqori saviyada tashkil etish, jarayonlarni qiziqarli video kontentlar orqali o‘quvchilar o‘rtasida keng targ‘ib qilish bo‘yicha muhim vazifalar aytib o‘tildi.
Tadbir so‘nggida vazirlik mas’ullari va hududiy boshqarma boshliqlarining kun tartibidagi mavzularga oid hisobotlari tinglandi.