O‘zbekiston Respublikasi Maktabgacha va maktab taʼlimi vazirligi

Bugungi brifing davomida “Yil o‘qituvchisi” tanlovining birinchi bosqich natijalari hamda ikkinchi bosqichning muhim jihatlari xususida batafsil so‘z yuritamiz.
Xabaringiz bor, Vazirlar Mahkamasining 2025-yil 28-apreldagi tegishli qarori asosida ayni kunlarda umumiy o‘rta ta’lim tashkilotlari pedagog xodimlari o‘rtasida «Yil o‘qituvchisi» tanlovi o‘tkazilmoqda.
Ma’lumot uchun: tanlovda ishtirok etmoqchi bo‘lgan nomzodlar tanlovda ishtirok etish uchun murojaat yuborish vaqtida oliy yoki birinchi malaka toifasi hamda kamida besh yillik pedagogik ish stajiga ega bo‘lishi, shuningdek, tanlov o‘tkaziladigan o‘quv yilining boshidan ta’lim tashkilotida asosiy shtatda faoliyat yuritayotgan fan yoki boshlang‘ich sinf o‘qituvchisi bo‘lishi lozim.
Mazkur qarorga asosan, «Yil o‘qituvchisi» tanlovining birinchi bosqich sinovlari 2025 yil avgust-dekabr oylarida o‘tkazilgan malaka sinovlari natijalariga integratsiya qilingan holda tashkil etildi.

2025-yil avgust-dekabr oylarida o‘tkazilgan malaka sinovlarida umumiy hisobda 175 738 nafar pedagog ishtirok etgan bo‘lib, ularning 46 703 nafari «Yil o‘qituvchisi» tanlovi Nizomi talablariga to‘g‘ri kelganligi sababli, tanlovning birinchi bosqich jarayonlarida qatnashdi.
Tanlov Nizomida birinchi bosqichda har bir tuman (shahar)dan ballar ketma-ketligiga qat’iy rioya etgan holda eng yuqori ball to‘plagan 3 nafardan nomzod tanlovning ikkinchi bosqichiga o‘tkazilishi belgilangan.
Nomzodlarning ballari teng bo‘lgan taqdirda, ularni tanlab olish quyidagi ketma-ketlikda amalga oshiriladi:
nomzodning amaldagi malaka toifasi yuqoriligi;
ko‘p yillik pedagogik ish stajiga egaligi;
mutaxassislik fanidan yuqori ball to‘plagani; 
Yuqoridagi barcha holatlarda ham ballar teng kelib qolgan taqdirda, istisno tariqasida, nomzodlarning barchasi ikkinchi bosqichga o‘tkaziladi.
O‘rnatilgan tartibga muvofiq, har bir tuman (shahar)dan 3 nafardan, ya’ni jami 624 nafar pedagog «Yil o‘qituvchisi» tanlovining ikkinchi bosqichiga o‘tkazildi.
Tanlovning birinchi bosqich natijalari va egallagan o‘rinlaridan norozi bo‘lgan pedagoglarga belgilangan muddatlarda shaxsiy kabinetlari orqali apellyasiya arizasi topshirish imkoniyati yaratildi.
Mazkur vaqt davomida jami 264 nafar pedagogdan apellyasiya murojaatlari kelib tushdi hamda ular Apellyasiya komissiyasi tomonidan o‘rnatilgan tartib asosida ko‘rib chiqildi.
O‘rganish natijalariga ko‘ra, Apellyasiya komissiyasi tomonidan 8 nafar pedagogning murojaati asosli, deb topildi hamda ushbu nomzod o‘qituvchilar tanlovning ikkinchi bosqichiga tavsiya etildi. Bu haqida mazkur pedagoglarning pedagog.uzedu.uz platformasidagi shaxsiy sahifalariga xabarnoma yuborildi.
Shuningdek, tanlov Tashkiliy qo‘mitasining tegishli yig‘ilish bayoniga asosan, tanlovning birinchi bosqich natijalariga tegishli o‘zgartirishlar kiritildi va bu haqida tegishli tuman (shahar)lardagi pedagoglarning pedagog.uzedu.uz platformasidagi shaxsiy sahifalariga qo‘shimcha xabarnoma yuborildi.
«Yil o‘qituvchisi» tanlovi Tashkiliy qo‘mitasining qaroriga asosan, tanlovning ikkinchi bosqichi joriy yilning 10-fevral kuni mamlakatimizning barcha hududlarida belgilangan umumta’lim maktablarida boshlanishi rejalashtirilgan.
Ikkinchi bosqichda nomzodlarning o‘z fani bo‘yicha dars o‘tish mahorati belgilangan mezonlar, xususan hakamlar hay’ati tomonidan – 60 ballik tizim asosida, tegishli tuman (shahar)da faoliyat yuritayotgan pedagoglar tomonidan (ovoz berish yo‘li orqali) 40 ballik tizim asosida baholanadi.
Pedagoglarning ovoz berishlari uchun nomzodning 45 daqiqalik dars o‘tish jarayoni uzluksiz, to‘liq videokameraga yozib olinadi hamda montajsiz tarzda belgilangan tartibda pedagog.uzedu.uz maxsus platformasiga joylashtiriladi.

Hakamlar hay’ati va pedagoglar tomonidan berilgan ballar asosida nomzodning umumiy natijasi shakllantiriladi.
Hakamlar hay’ati tomonidan tanlovning ikkinchi bosqich natijalari umumlashtirilmaguniga qadar e’lon qilinmaydi. 
Ikkinchi bosqich
yakunlariga ko‘ra, har bir tuman (shahar)dan eng yuqori ball to‘plagan 2 nafar nomzod tanlovning uchinchi bosqichida ishtirok etish uchun tavsiya etiladi.
 

Nomzodlarning egallagan ballari teng bo‘lib qolgan taqdirda, maxsus platforma orqali qayta ovoz berish tashkil etiladi hamda qayta baholash natijasida ko‘p ball to‘plagan nomzod keyingi bosqichga o‘tadi.
Tanlovning ikkinchi bosqich natijalari hamda uchinchi bosqichda ishtirok etishga tavsiya etilgan nomzodlar to‘g‘risidagi ma’lumotlar Tashkiliy qo‘mita tomonidan e’lon qilinadi.

Hurmatli pedagoglar!

Sizlarga yetkazmoqchi bo‘lgan ma'lumotlarimiz shundan iborat edi. 
E’tiboringiz uchun rahmat.