Elektron hisobvaraq-fakturalarda xavf darajasini baholash: yangi yondashuv
2025-10-15 13:00:00 / Qo'mita yangiliklari
Elektron hisobvaraq-fakturalarda xavf darajasini baholash: yangi yondashuv
Soliq qo‘mitasida elektron hisobvaraq-fakturalar (EHF) xavf darajasini real vaqt rejimida avtomatik baholashning yangi tizimini tushuntirishga bag‘ishlangan matbuot anjumani bo‘lib o‘tdi.
Mazkur tizim 2026-yil 1-yanvardan boshlab O‘zbekiston Respublikasi Prezidentining Farmoni ijrosini ta'minlash maqsadida joriy etilmoqda hamda EHF rasmiylashtirish jarayonida qonunbuzilish ehtimolini baholash imkonini beruvchi kompleks mezonlar tahliliga asoslanadi.
Yangi tizim har bir EHFni yaratish jarayonidayoq avtomatik tahlil qiladi va unga xavf darajasini belgilaydi. Agar yuqori xavf belgilari aniqlansa, EHFning maqomi xaridorga koʻrsatiladi.
Yangi yondashuv soliq oqibatlarini baholash va hamkor tanlashda ehtiyotkorlikni taʼminlaydi.
Soliq organlari tomonidan xufiyona iqtisodiyotning oldini olish, qonun ustuvorligini taʼminlash, shu bilan birga insofli, soliqlarni oʻz vaqtida, vijdonan toʻlaydigan soliq toʻlovchilarning manfaatlarini himoya qilish maqsadida shubhali operatsiyalarni aniqlash boʻyicha tizimli ishlar olib borilmoqda.
Jamoatchilik bilan aloqalar boshqarmasi