Tadbirkorlar endi mavsumiy faoliyat uchun tutash yer uchastkalarini E-ijara tizimi orqali ijaraga olishlari mumkin
2025-10-14 09:05:00 / Qo'mita yangiliklari
Tadbirkorlar endi mavsumiy faoliyat uchun tutash yer uchastkalarini E-ijara tizimi orqali ijaraga olishlari mumkin
2025-yil 1-oktabrdan boshlab, umumiy ovqatlanish, savdo va xizmat koʻrsatish sohasida faoliyat yuritayotgan tadbirkorlar uchun umumiy foydalanishga moʻljallangan yer uchastkalarini ijaraga olish boʻyicha yangi tizim joriy etildi.
VMQ-478-son, 31.07.2025-yil.
Endilikda, ushbu biznes subyektlari mavsumiy tijorat faoliyatini amalga oshirish uchun oʻz binolari, inshootlari yoki yer uchastkalari yaqinidagi tutash yer uchastkalarini, shuningdek, davlat organlari va tashkilotlariga doimiy foydalanishga beriladigan yer uchastkalarini rasmiy ravishda ijaraga olishlari mumkin.
Soliq qoʻmitasining Ijara shartnomalarini hisobga qoʻyish – E-ijara tizimida bunday turdagi yer uchastkalari ijara shartnomasini roʻyxatga olish imkoniyati yaratildi.
Ushbu tartib tibbiyot, taʼlim va maktabgacha taʼlim muassasalariga tegishli yerlarga tatbiq etilmaydi.
Maʼlumot uchun: Shartnoma muddatidan qatʼi nazar har bir kvadrat metr yer uchastkalari uchun yer soligʻi stavkasining uch baravarigacha boʻlgan ijara toʻlovi belgilanadi.
Shu bilan birga, yer soligʻi asosida hisoblangan summa Soliq kodeksida belgilangan koʻpaytirish va kamaytirish koeffitsiyentlari qoʻllanilgan holda, soliq imtiyozlarisiz hisoblanadi.
Yer soligʻi stavkalari bilan shu yerda tanishish mumkin.
Yuridik shaxslarga xizmat ko‘rsatish departamenti