Barqarorlik reytingi tadbirkorlarni ochiq va qonuniy faoliyat yuritishga rag‘batlantiradi
2025-09-17 14:35:00 / Qo'mita yangiliklari
Barqarorlik reytingi tadbirkorlarni ochiq va qonuniy faoliyat yuritishga rag‘batlantiradi
O‘tgan yildan boshlab O‘zbekistonda tadbirkorlarning barqarorlik reytingi joriy etildi. Endilikda biznes faoliyati soliq intizomi va moliyaviy barqarorlikning 23 ta mezoni asosida elektron tizim orqali baholanmoqda.
Baholash natijalariga ko‘ra, tadbirkorlar eng yuqori AAA (96–100 ball) darajadan eng past D (25 balldan kam) darajagacha bo‘lgan toifalarga ajratiladi.
Yuqori reyting tadbirkorlarga quyidagi afzalliklarni taqdim etadi:
- soliq tekshiruvlaridan ozod etish (AAA);
- tekshiruvsiz QQSni 1 kunda qaytarish (AAA);
- boshqa soliqlar bo‘yicha ortiqcha to‘lovlarni 3 kun ichida qaytarish (A va undan yuqori).
Hozirgi kunda tizimda 552,8 mingdan ortiq tadbirkorlik subyekti ro‘yxatdan o‘tgan. Ulardan 2,3 mingta tashkilot AAA reytingiga ega bo‘lsa, D toifaga qariyb 192 ming subyekt kiradi. Joriy yil boshidan AAA reytingiga ega tadbirkorlarga 1,8 trln so‘m QQS avtomatik tarzda 1 kun ichida qaytarildi.
Tizim shaffof bo‘lib, tadbirkorlar o‘z reytingini my3.soliq.uz saytida shaxsiy kabinet orqali yoki Soliq mobil ilovasi yordamida bilib olishlari mumkin. Reyting, shuningdek, tadbirkorlarga hamkorlarning ishonchliligini tekshirish va shubhali bitimlardan qochish imkonini ham beradi.
Barqarorlik reytingi bo'yicha qo'llanma
Xavfni tahlil qilish va soliq to‘lovchilarni segmentlash boshqarmasi