Qariyb 100 nafar soliq organi xodimi Rossiya FSX Akademiyasi o‘quv kurslarida ishtirok etadi
2025-08-08 18:00:00 / Qo'mita yangiliklari
#hamkorlik
O‘zbekiston Respublikasi Soliq qo‘mitasi va Rossiya Federatsiyasi Federal soliq xizmati o‘rtasida imzolangan bitim doirasida joriy yilning avgust oyidan soliq xizmati xodimlari uchun o‘quv kurslari boshlandi.
O‘quv jarayonlari Sankt-Peterburg shahridagi Federal soliq xizmati yetakchilik va biznez-jarayonlarni boshqarish Akademiyasi bazasida bo‘lib o‘tmoqda. Soliq xizmatining turli bo'linmalarida ishlab kelayotgan 99 nafar mutaxassislar bir oy davomida o‘quv dasturlarida ishtirok etadi.
Mutaxassislarning birinchi guruhi 3-10 avgust kunlari bo‘lib o‘tadigan mashg‘ulotlarga allaqachon kirishdi. Xalqaro ta'lim seminarining maqsadi soliq nazorati sohasida tajriba almashishga mo‘ljallangan.
Navbatdagi kurslarning mavzulari zamonaviy soliq siyosati va ma'muriyatchiligining asosiy yo'nalishlarini o'z ichiga oladi, jumladan:
▫️elektron xizmatlar ushun QQSning xususiyatlari;
▫️JShODS ma'muriyatchiligi bo‘yicha eng yaxshi amaliyot;
▫️xalqaro soliqqa tortish masalalari va transfert narxlarni belgilash;
▫️soliq ma'murchiligida mijozga yo‘naltirilgan yondashuvni rivojlantirish;
▫️yirik soliq to‘lovchilar bilan ishlash va boshqa muhim jihatlar.
O‘quv dasturi xodimlarning kasbiy mahoratini yuksaltirish, xalqaro tajribalarni o‘rganish hamda O‘zbekiston soliq tizimida ilg‘or tajribalarni qo‘llashga qaratilgan.