1 trln soʻmlik shartnoma: beeʼtiborlikmi yoki huquqbuzarlik?

Soliq sohasini raqamlashtirish borasida amalga oshirilayotgan islohotlar tadbirkorlik subyektlari tomonidan yoʻl qoʻyilayotgan qoʻpol xato va kamchiliklarni barvaqt aniqlab, xufiyona iqtisodiyotning oldini olishga xizmat qilmoqda.

Xususan, bugungi kunda Soliq qoʻmitasi tomonidan mavjud maʼlumotlar bazasini raqamli tahlil qilish asosida elektron hisobvaraq-faktura (EHF)larning xavf darajasini aniqlash boʻyicha maxsus axborot tizimi ishlab chiqilmoqda. 

Mazkur tizim hozirda ishlab chiqish jarayonida boʻlishiga qaramasdan, EHFni rasmiylashtirishdagi qoʻpol qonunbuzilish holatlarini aniqlab koʻrsatmoqda.

Masalan: «Alfa» MCHJ (nomi oʻzgartirilgan) chorvachilik xoʻjaligi sifatida joriy yil iyul oyida roʻyxatdan oʻtib, faoliyatini boshlagan. Tadbirkor sifatidagi ilk shartnomasiga koʻra, salkam 1 trln soʻm, aniqrogʻi 896 mlrd soʻmlik (QQS – 96 mlrd soʻm) qora metall realizatsiyasi boʻyicha EHF rasmiylashtirgan. 

Yana bir kompaniya – «Beta» MCHJ (nomi oʻzgartirilgan), asosiy faoliyati chakana savdo boʻlgani holda, EHF orqali 225 mlrd soʻmlik (QQS – 27 mlrd soʻm) qurilish materiallarini realizatsiya qilgan, biroq ushbu mahsulotlar amalda kirim qilinmagan.  Shuningdek, rasman roʻyxatdan oʻtgan xodimlari va asosiy vositalari mavjud emasligiga qaramay, vositachilik asosida paxta tolasini qayta ishlash xizmatlari boʻyicha 11 mlrd soʻmlik (QQS – 1,2 mlrd soʻm) bir nechta EHF rasmiylashtirgan.

Maʼlumot uchun:  EHFlarning xavf darajasini aniqlash boʻyicha maxsus axborot tizimi hozirda test rejimida ishga tushirilgan va unda aniqlangan qonunbuzilish holatlari boʻyicha hali biron jazo choralari qoʻllanilmagan.