Elektron xarid qilish dalolatnomalari: biznes uchun yanada oshkoralik va qulaylik
2025-06-05 09:50:00 / Qo'mita yangiliklari
Ma’lumki, 2024-yil 1-dekabrdan boshlab umumiy ovqatlanish korxonalari, 2025-yil 1-martdan esa eksportyorlar jismoniy shaxslardan qishloq xo‘jaligi mahsulotlarini sotib olganda xarid qilish dalolatnomalarini elektron shaklda rasmiylashtirishlari mumkin bo‘ldi.
Buning natijasida bozor talablari va qishloq xo‘jaligi mahsulotlarining realizatsiya hajmini tizimli tahlil qilish imkoni yaratildi.
Muhim! Xarid qilish dalolatnomalarini shakllantirishda sotuvchi jismoniy shaxsning JSHSHIR raqamini ko‘rsatish talab qilinmaydi.
2025-yil 2-iyun holatiga ko‘ra:
- 239 ta umumiy ovqatlanish korxonalari jismoniy shaxslardan 176 turdagi qishloq xo‘jaligi mahsulotlarini 60,2 mlrd so‘mga sotib olgan;
- 166 ta eksportyor tashkilotlar 79 turdagi shunday mahsulotlarni 1 trln so‘mdan ortiq summaga xarid qilgan.
Umumiy ovqatlanish korxonalari tomonidan eng ko‘p xarid qilingan mahsulotlar:
- mol go‘shti – 195 tonna, 20,3 mlrd so‘m;
- qo‘y go‘shti – 70 tonna, 8,7 mlrd so‘m;
- guruch – 138 tonna, 3,2 mlrd so‘m;
- pomidor – 81 tonna, 2,4 mlrd so‘m.
Eksportyorlar orasida eng talabgor mahsulotlar:
- olma – 50,4 ming tonna, 154,9 mlrd so‘m;
- karam – 19,2 ming tonna, 117,8 mlrd so‘m;
- quritilgan mevalar – 8,4 ming tonna, 105,8 mlrd so‘m;
- gilos – 4,4 ming tonna, 102,6 mlrd so‘m.
Xarid qilish dalolatnomalarini elektron shaklda joriy etish hujjat aylanmasini soddalashtirdi va oshkoralikni oshirdi. Bu mexanizm daromadlarni legallashtirish, ochiq bozorni shakllantirish va agrar sohada raqamli iqtisodiyotni rivojlantirishga xizmat qilmoqda.
QQS ma'muriyatchiligi boshqarmasi
