Soliqdan qochish sxemalari: qurilish tashkilotiga 1 mlrd so‘mlik salqin ichimliklar nima uchun kerak?
2024-09-20 18:05:00 / Qo'mita yangiliklari
Davlat roʻyxatidan oʻtish paytida tashkilot oʻzining asosiy faoliyatini - qurilish materiallari ishlab chiqarish deb koʻrsatgan.
Ayni paytda mazkur tashkilot elektron hisobvaraq-faktura (EHF) orqali 1 milliard soʻmlik salqin ichimliklar xaridini amalga oshirgan.
Mazkur holatda soliq qonunchiligi va biznesni yuritish nuqtayi nazaridan qanday savollar yuzaga keladi?
Birinchidan, tashkilot koʻrsatilgan faoliyat turiga mos kelmaydigan bitimni amalga oshirmoqda. Bu soliq organlarining eʻtiborini kuchaytirishi muqarrar. Soliq solish maqsadida soliq toʻlovchi tomonidan amalga oshirilgan barcha operatsiyalar iqtisodiy mazmunidan kelib chiqqan holda hisobga olinadi. Soliq organlari darhol bitim soxta ekanligiga shubha qilishadi va bunday soliq toʻlovchini soliqqa oid huquqbuzarlik qilish xavfi darajasini tekshirish jarayonini boshlaydilar. Bu kameral va sayyor soliq tekshiruvi tayinlanishiga olib kelishi mumkin.
Ikkinchidan, agar bitim soxta deb topilsa, bu sotuvchiga kelib tushgan pul mablag'larining barcha summasidan foyda soligʻi hamda uning kontragenti (xaridor)ga hisobga olingan QQS summalarining kamayishi hisobiga qoʻshimcha QQS, shuningdek penya va jarimalar hisoblanishiga sabab boʻladi.
Uchinchidan, soliq toʻlovchi bunday miqdordagi tovarlarni qayerda saqlaydi?, degan savol tugʻiladi. Darhol soliq organlarining “E-ijara” dasturi hamda Kadastr maʻlumotlar bazasi oʻrganiladi. Oʻzining yoki ijaraga olingan ombori boʻlmagan taqdirda, tovarlar kamomadi deb baholanishi va Soliq kodeksining 223-moddasiga muvofiq soliqlar va jarimalar hisoblanishi mumkin.
Toʻrtinchidan, soliq toʻlovchi shubhali tashkilotlar roʻyxatiga kiritilishi mumkin, uning QQS toʻlovchi maxsus guvohnomasi toʻxtatib turiladi, hisobvaraq-fakturalarni QQS bilan rasmiylashtira olmaydi va tashkilotning kontragentlari bunday soliq toʻlovchidan olingan soliqni hisob (zachet)ga ola olmaydi.
Bular bunday vaziyatlarda yuzaga kelishi mumkin boʻlgan oqibatlarning hammasi emas.
Huquqni muhofaza qiluvchi organlar "naqdlashtiruvchi" subyekt sifatida shubhalanishlari va bunday soliq toʻlovchi bilan qiziqishlari mumkin.
Shunday qilib, ushbu holat jiddiy huquqiy va moliyaviy oqibatlarga olib kelmasligi uchun korxona faoliyatini qonun hujjatlariga muvofiq yuritish boʻyicha puxta tahlil va choralar koʻrishni talab qiladi.
Qo‘shilgan qiymat solig‘i ma’muriyatchiligi boshqarmasi
