“Olmaliq kon-metallurgiya kombinati” AJda soliq islohotlariga bag‘ishlangan seminar tashkil etildi

2026-yil 18-fevral kuni "MISIS" milliy texnologik tadqiqotlar universitetining Olmaliq filialida "Olmaliq kon-metallurgiya kombinati" AJning iqtisodiy yo‘nalishida faoliyat yurituvchi xodimlari uchun ilmiy-amaliy seminar bo‘lib o‘tdi. Tadbir “Budjet–soliq siyosatida amalga oshirilayotgan islohotlarning ustuvor yo‘nalishlari” mavzusiga bag‘ishlandi.

Seminar Soliq qo‘mitasi hamda Yirik soliq to‘lovchilar bo‘yicha hududlararo soliq inspeksiyasi mutaxassislari, shuningdek, Toshkent davlat iqtisodiyot universiteti professor-o‘qituvchilari hamkorligida tashkil etildi.

Tadbir davomida 2026-yil 1-yanvardan kuchga kirgan soliq va budjet siyosatidagi yangiliklar batafsil sharhlanib, ularni amaliyotda qo‘llash mexanizmlari tushuntirildi. Jumladan:

- foyda solig‘ini to‘g‘ri hisoblash amaliyoti;
- QQS va aksiz soliqlari bo‘yicha ortiqcha to‘lovlarni qaytarish tartibi;
- jismoniy shaxslardan olinadigan daromad solig‘i va ijtimoiy soliqdagi imtiyozlar;
- resurs soliqlarini hisoblashdagi o‘ziga xos jihatlar;
- korxona rentabelligini oshirish va moliyaviy samaradorlikni tahlil qilish masalalari muhokama qilindi.

Seminar yakunida ishtirokchilarning savollariga batafsil javoblar berildi hamda qonunchilik normalarini bir xilda qo‘llash yuzasidan amaliy tavsiyalar bildirildi.

Bunday uchrashuvlar yirik soliq to‘lovchilar bilan o‘zaro hamkorlikni mustahkamlash, iqtisodiy jarayonlarning shaffofligini ta’minlash va professional salohiyatni oshirishga xizmat qiladi. 

Soliq qoʻmitasi Matbuot xizmati