Poytaxtimizning Yangihayot tumanidagi mahallalar infratuzilmasi o‘rganildi
2026-02-04 12:25:00 / Qo'mita yangiliklari
Poytaxtimizning Yangihayot tumanidagi mahallalar infratuzilmasi o‘rganildi
Soliq qo‘mitasi Raisi Farrux Pulatov, Oliy Majlis Senatining Mudofaa va xavfsizlik masalalari qo‘mitasi raisi Qutbiddin Burxonov hamda Toshkent davlat yuridik universiteti rektori Baxshillo Xodjayev Yangihayot tumanida mahallalar infratuzilmasini rivojlantirish, aholi turmush sharoitini yanada yaxshilash hamda kriminogen vaziyatni barqarorlashtirish bo‘yicha amalga oshirilayotgan ishlarni o‘rgandi.
Yangi O‘zbekistonning zamonaviy qiyofasi mahalladan boshlanishi bois uning infratuzilmasini yanada yaxshilash, shuningdek, aholi farovonligiga salbiy ta’sir ko‘rsatayotgan kriminogen omillar bilan tizimli ishlash masalalariga alohida e’tibor qaratildi. Bu borada mahallalar kesimida tashkil etilgan Shtab faoliyatining yo‘lga qo‘yilgani muhim omil bo‘lmoqda.
Tuman hokimligi binosida barcha mas’ul idora va tashkilotlar vakillarini qamrab olgan situatsion markaz tashkil etilishi, uning jinoyatchilikning oldini olish, tahlil va monitoring ishlaridagi ahamiyatiga alohida e’tibor qaratilishi ta’kidlandi. Ushbu markaz orqali hududdagi vaziyatni doimiy nazorat qilish va tezkor choralar ko‘rish imkoniyati yaratilayotgani qayd etildi.
Ishchi guruh a’zolari tumandagi “Xushnud” hamda “Yangi Darxon” mahallalarida bo‘lib, joylarda amalga oshirilayotgan ishlar bilan bevosita tanishdi.
Xususan, “Xushnud” mahallasida 4 521 ta xonadon mavjud bo‘lib, ushbu hududda 14 610 nafar aholi istiqomat qiladi. Mazkur mahalla boshqa hududlarga nisbatan sodir etilgan jinoyatlar soni ko‘p mahallalar qatoriga kiritilgan. Shu sababli, bu yerda jinoyatchilikning oldini olish va ijtimoiy muhitni sog‘lomlashtirish bo‘yicha muhim chora-tadbirlar belgilandi.
Keyingi manzil – “Yangi Darxon” mahallasi. Mazkur fuqarolar yig‘inidagi 6 327 ta xonadonda 18 297 nafar aholi istiqomat qiladi. Ushbu hududda ham infratuzilmani yaxshilash, aholi bandligini ta’minlash va huquqbuzarliklarning oldini olishga qaratilgan ishlar tahlil qilinib, amalga oshirilishi zarur bo‘lgan dolzarb vazifalar belgilab olindi.
Elmurod Davlatov, “Yangi Darxon” MFY raisi:
Jinoyatchilikning oldini olish, maktab bitiruvchilarini, aholi bandligini ta’minlash, kambag‘allikni qisqartirish va boshqa barcha belgilangan vazifalarni bajarishda mas’ul idoralar bizga yaqindan amaliy va huquqiy yordam beryapti. Hozirgi kunda mahallamiz “sariq” toifada turibdi. Shuni “yashil” toifaga aylantirishga, jinoyatchilikdan holi hududga aylantirishga, oilalar o‘rtasida ajrimlarni kamaytirishga, aholi o‘rtasida bir-biriga bo‘lgan mehr-oqibatni kuchaytirish, mahallamiz aholisi turmush farovonligini oshirishga mahalla yettiligi barchamiz birgalikda harakat qilamiz.
O‘rganishlar yakunida Prezidentimizning 2026-yil 5-yanvardagi 1-son qarori ijrosini ta’minlash doirasida Yangihayot tumani mahallalari kesimida kompleks chora-tadbirlarni amalga oshirish, jinoyatchilikning oldini olish hamda ijtimoiy muhitni yanada sog‘lomlashtirish bo‘yicha amalga oshiriladigan vazifalar belgilab olindi.