Ulgurji savdo korxonasi haqiqiy faoliyatsiz 250 mlrd so‘mlik EHFlarni rasmiylashtirdi

Soliq qo‘mitasi tadbirkorlar tomonidan elektron hisobvaraq-fakturalar (EHF) rasmiylashtirishda yo‘l qo‘yilayotgan qo‘pol xatolar va soliq qonunchiligi buzilishi holatlari haqida ma’lumot berib borishni davom ettirmoqda. 

Bunday holatlar maxsus axborot-tahliliy tizim orqali aniqlanmoqda. U mavjud raqamli ma’lumotlar tahlili asosida EHFlarning xavf darajasini real vaqt rejimida avtomatik tarzda belgilab beradi.

Masalan, 2020-yil oktyabr oyida ulgurji savdo faoliyati bilan shugʻullanish uchun tashkil etilgan “Raketa” MChJ (nomi oʻzgartirilgan) ustav jamgʻarmasi 400 mln soʻmni tashkil etib, egaligida yoki ijarada mulki, faol ishchilari, transport vositalari boʻlmasdan uzoq vaqt davomida faoliyat koʻrsatmasdan joriy yilning noyabr oyining 5-11 sanalari davomida oktyabr va noyabr oylari uchun 250,8 mlrd soʻm (QQS – 26,9 mlrd soʻm) miqdorida har xil turdagi qurilish mahsulotlari, maishiy texnika, elektr jixozlar, yogʻoch mahsulotlari, oziq ovqat, qishloq xoʻjaligi mahsulotlari hamda turli xizmatlar (qurilish, reklama, avtokran, yuk tashish, umumiy ovqatlanish va h.k) boʻyicha EHF rasmiylashtirgan.

Rasmiylashtirilgan EHFlar boʻyicha hisoblangan QQS summasining bir soʻmi ham budjetga toʻlanmagan va natijada yirik qarzdorlik hosil bo‘lgan. 

Eslatib o‘tamiz: EHFlarning xavf darajasini aniqlash bo‘yicha maxsus axborot tizimi hozirda test tartibida faoliyat yuritmoqda va aniqlangan holatlar bo‘yicha hozircha hech qanday chora-tadbirlar ko‘rilmagan.

Mazkur tizim 2026-yil 1-yanvardan boshlab joriy etiladi. 

QQS ma'muriyatchiligi departamenti