Farg’оnа vilоyati Qo’qon shahar hоkimligi

Rejaga asosan, “Qo‘qon savdo kompleksi”, “Farobiy savdo kompleksi” hamda boshqa yirik savdo hududlari atrofida zamonaviy ko‘p qavatli avtoturargohlar qurilishi belgilangan. Shuningdek, bozorlar atrofidagi tartibsiz avtoturargohlar, noqonuniy pul yig‘imlari va noqonuniy taksi nuqtalarini bartaraf etish rejalashtirilgan. 

Piyodalar xavfsizligini ta’minlashga ham alohida e’tibor qaratilib, “Qo‘qon savdo kompleksi” hamda “Buyuk ipak yo‘li savdo kompleksi” o‘rtasida yer osti yo‘lagi qurish bo‘yicha taklif ishlab chiqilishi qayd etilgan. Bundan tashqari, bozorlarga tutash ko‘chalarda yangi bekatlar tashkil etish, mavjudlarini qayta tiklash hamda avtobuslar harakatini qat’iy tartibga solish vazifalari belgilandi. 

Topshiriqda noqonuniy ko‘cha savdolariga chek qo‘yish, piyodalar yo‘laklarini bo‘shatish, yo‘l belgilarini yangilash va svetoforlarning muntazam ishlashini ta’minlash bo‘yicha mas’ullarga aniq vazifalar yuklatilgan. 

Shuningdek, savdo komplekslarida yong‘in xavfsizligi, sanitariya-gigiyena talablariga rioya etilishi, kuzatuv kameralari sonini oshirish hamda “Situatsion markaz” tashkil etish orqali hududlarni to‘liq raqamlashtirish ishlari amalga oshiriladi. 

Mazkur chora-tadbirlar orqali Qo‘qon shahridagi bozorlarda aholi uchun yanada qulay, xavfsiz va tartibli muhit yaratish maqsad qilingan.