O‘zbekiston va Xitoy metropoliten va temir yo‘l transporti sohasidagi hamkorlikni kengaytirmoqda
2025-08-22 21:20:00 / Yangiliklar
22-avgust kuni O‘zbekiston Respublikasi Investitsiyalar, sanoat va savdo vazirligida vazir o‘rinbosari Ilzat Kasimov Xitoyning Tianjin Rail Transit Group kompaniyasi bosh direktor o‘rinbosari Ma Yunkan bilan uchrashuv o‘tkazdi.
Uchrashuvda metropoliten va temir yo‘l transportini rivojlantirish bo‘yicha istiqbolli loyihalar muhokama qilindi. Xitoy tomoni Toshkent metropolitenining mavjud yo‘nalishlarini rekonstruksiya qilish hamda yangi liniyalar qurilishida ishtirok etishga qiziqish bildirdi.
Ta’kidlanganidek, ushbu loyihalarning amalga oshirilishi mamlakat transport infratuzilmasini yanada modernizatsiya qilishga, aholiga qulay va zamonaviy transport xizmatlarini taqdim etishga xizmat qiladi.
Bundan tashqari, tomonlar hamkorlikning ustuvor yo‘nalishlarini ko‘rib chiqib, muloqotni davom ettirish niyatini bildirish bilan birga, o‘zaro anglashuv memorandumi imzolash tashabbusini ham kelishib oldilar.