O‘zbekiston Respublikasi Investitsiyalar, sanoat va savdo vazirligi

Toshkent Xalqaro Investitsiyalar forumining to’rtinchi kunida “Turkiy davlatlar investitsiyalarni rag‘batlantirish agentliklari rahbarlarining aloqa va hamkorlikni rivojlantirish bo‘yicha uchrashuvi” bo’lib o’tdi. Turkiy investitsiya fondi bosh direktori Ramil Babayev moderatorlik qilgan ushbu panel sessiyasida Turkiy davlatlar investitsiyalarni rag‘batlantirish agentliklari qizg’in suhbat olib bordi.

Sessiya doirasida turkiy davlatlarning investitsiya agentliklari vakillari ishtirokida iqtisodiy aloqalarni chuqurlashtirish masalalari yuzasidan jonli muhokamalar olib borildi.

Qayd etilishicha, Turk investitsiya jamg‘armasi mintaqaviy infratuzilma, savdo va tadbirkorlik loyihalarini moliyalashtirishga qaratilgan bo‘lib, uning o‘sib borishi mintaqada kichik va o‘rta biznesni qo‘llab-quvvatlash, savdo va tadbirkorlikni rivojlantirishga keng imkoniyatlar yaratmoqda.

Spikerlar:

Farid Mammadov, Turkiy davlatlar tashkiloti loyiha direktori

Shoxrux Gulamov, O‘zbekiston Respublikasi Investitsiyalar, sanoat va savdo vaziri o‘rinbosari

Bag‘dod Amreyev, Turkiy investitsiya fondi prezidenti

Yusif Abdullayev, Ozarbayjon Respublikasi Eksport va investitsiyalarni rag‘batlantirish agentligi ijrochi direktori

Yerjan Yelekeyev, Qozog‘iston Respublikasi "Kazakh Invest" milliy kompaniyasi boshqaruvi raisi

Farxad Iminov, Qirg‘iziston Respublikasi Prezidenti huzuridagi Milliy investitsiya agentligi direktori

Mahmut Muhiddin keskin, Turkiya Respublikasi Prezidenti huzuridagi Investitsiyalar va moliya boshqarmasi Strategiya bo‘limi rahbari va vitse-prezidenti

Mansurjon Rasulov, O‘zbekiston Respublikasi Investitsiyalar, sanoat va savdo vazirligi huzuridagi Investitsiyalarni rag‘batlantirish agentligi direktori vazifasini bajaruvchi

Muhokamaning asosiy mavzusi investitsiyaviy istiqbollar, iqtisodiy aloqalarni mustahkamlash va mintaqada biznesni rivojlantirish masalalari bo‘ldi. Shuningdek, muloqot chog‘ida ko‘p tomonlama savdo-iqtisodiy munosabatlar barqarorligini ta’minlash chora-tadbirlari ham muhokama qilindi. Alohida tartibda iqtisodiyotga innovatsiyalar va raqamli texnologiyalarni joriy etish bo‘yicha qo‘shma rejalar ko‘rib chiqildi.

Investitsiyalar, sanoat va savdo vaziri o‘rinbosari Shoxrux Gulamov O‘zbekistonda prezident Shavkat Mirziyoyev boshchiligidagi islohotlar jadal davom etayotganini qayd etib, 2024 yilda mamlakatga jalb qilingan to‘g‘ridan to‘g‘ri investitsiyalar miqdori qariyb 35 mlrd dollarni tashkil qilganini ma’lum qildi. “Bu esa islohotlar boshlangan 2017 yilda qayd etilgan ko‘rsatkichga nisbatan 10 barobar yuqori”, - deya qo‘shimcha qildi u.

Ma’lumotlarga ko‘ra, O‘zbekistonning yalpi ichki mahsuloti so‘nggi yillarda 6 foizdan yuqori o‘smoqda va 2030 yilgacha 200 milliard AQSh dollariga yetishi kutilmoqda. Bunda umumiy investitsiyalar ko‘rsatkichi yillik 100 million dollarga yetishi prognoz qilinmoqda.

Sessiya davomida spikerlar tomonidan Turkiy davlatlarning iqtisodiy ko‘rsatkichlari va salohiyatlari yuqori ekani, birgalikda hamkorlikni kuchaytirish orqali bu raqamlarni yanada oshirish imkoniyati mavjudligi ta‘kidlandi. Hozirgi vaqtda Turkiy davlatlarining birgalikdagi yalpi ichki mahsuloti 1,8 trillion AQSh dollariga yetdi, aholisi esa 170 million nafardan oshdi.

Mutaxassislar Turkiy davlatlar o‘rtasida tashqi savdoni oshirish muhimligini, hamkorlikni rivojlantirish uchun keng imkoniyatlar borligini qayd etdi. “Energiya va gazni chetga olib qo‘yib, Turkiya va Vengriyaning TOP 10 savdo hamkorlariga qarasak birorta ham Turkiy davlatni topolmaymiz. O‘zbekiston, Qozo‘g‘iston, Qirg‘iziston va Ozarbayjonda esa bunday ro‘yxatda 1 yoki 2 ta Turkiy davlatni ko‘rishimiz mumkin. O‘zaro hamkorlikni yaxshilash va rivojlanish uchun imkoniyat bor”, - deydi moderator Ramil Babayev.

Investitsiyalar, sanoat va savdo vazirligi huzuridagi Investitsiyalarni rag‘batlantirish agentligi direktori vazifasini bajaruvchi Mansurjon Rasulov investorlar uchun O‘zbekistondagi imkoniyatlar haqida shunday deydi:

“Rivojlanayotgan bozorda odatda likvidlikning yuqori darajasini ko‘ramiz. Agar pulingizni o‘zbek so‘mida banklarga qo‘yadigan bo‘lsangiz, yillik 20 foizdan yuqori davlat tomonidan kafolatlangan hech qanday xatarsiz foyda olishi mumkin bo‘ladi. Bu aholi uchun juda yaxshi bo‘lsada, kapital bozor uchun aksincha. Hech kim bunday holatda aksiya sotib olishni xohlamaydi. Shu sababli kichik va o‘rta biznes egalari uchun kapital taqchilligi bor va bu xorijiy investorlar uchun turli xil loyihalarga cheksiz imkoniyatlarni taqdim qiladi”

Mansurjon Rasulov chet ellik investorlar Yevropadagi yoki boshqa davlatlardagi yondashuv O‘zbekistonda ham ishlaydi deb xato o‘ylashi haqida gapirib, bunday xatolar ko‘p uchrab turishi, O‘zbekistonda muvaffaqiyatga erishmoqchi bo‘lgan xorijliklar mahalliy biznes bilan integratsiya olib borishi muhimligini ta‘kidladi.

Panel sessiyasi ishtirokchilari bilan iqtisodiyotning turli tarmoqlari, ijtimoiy soha va hududlarni rivojlantirishda raqamlashtirish va elektron hukumat tizimini joriy etish darajasini o‘rganish va baholash bo‘yicha kelishuvga erishildi, bu boradagi sa’y-harakatlarni muvofiqlashtirish asosiy mezonlari va bosqichlari belgilab olindi.