O‘zbekiston Respublikasi Investitsiyalar, sanoat va savdo vazirligi

2025-yil 11-iyun kuni Toshkent Xalqaro Investitsiya Forumi doirasida “Barqaror investitsiyalarni jalb qilish: Islohotlardan muvaffaqiyat sari” mavzusida maxsus panel sessiyasi bo‘lib o‘tdi. Tadbirda O‘zbekistonda barqaror investitsiyalarni jalb qilishga qaratilgan islohotlar, shuningdek, “yashil” iqtisodiyot va raqamli o‘tish sohalarida amalga oshirilayotgan chora-tadbirlar namoyish etildi. Sessiya IHTT, OTB va Yevropa Ittifoqi bilan qo‘shma loyiha doirasida o‘tkazilib, unda O‘zbekistonning investitsiya siyosatini baholash hamda  takomillashtirish natijalari yoritildi.

Sessiya moderatori IHTT Yevroosiyo bo‘limi rahbari Uilyam Tompson bo‘ldi. Muhokama chog‘ida O‘zbekistonning 2017-yildan buyon iqtisodiyotni liberallashtirish, xususiy sektorni rivojlantirish va barqaror investitsiyalarni jalb etish borasida erishgan yutuqlari ko‘rib chiqildi. Ishtirokchilar mamlakatning 2030-yilga borib o‘rtachadan yuqori daromadli mamlakat maqomiga erishishi uchun zarur islohotlar va bu yo‘ldagi muammolar haqida fikr almashdilar.

Sessiya qatnashchilari

• Toyvo Klaar, Yevropa Ittifoqining O‘zbekiston Respublikasidagi elchisi;
• Kanokpan Lao-Araya, OTBning O‘zbekistondagi vakolatxonasi rahbari;
• Fares Al-Hossami, IHTT investitsiya bo‘limining sifat va to‘g‘ridan-to‘g‘ri xorijiy investitsiyalar ta’siri yo‘nalishi rahbari;
• Aziz G‘afurov, O‘zbekiston Respublikasi Prezidenti huzuridagi Xorijiy investorlar kengashi kotibiyati rahbari;
• Abdulla Hoshimov, O‘zbekiston Respublikasi investitsiyalar, sanoat va savdo vaziri maslahatchisi.

Sessiya davomida barqaror investitsiyalarni jalb qilish, “yashil” energetika va raqamli transformatsiya sohasidagi islohotlar, shuningdek, investitsiya muhitini yaxshilash uchun zarur bo‘lgan davlat siyosati vositalari muhokama qilindi. Sessiya O‘zbekistonning barqaror rivojlanish va iqtisodiy o‘sish tamoyillariga sodiqligini, shuningdek, xalqaro investorlar uchun ochiq va ishonchli mamlakat bo‘lib qolishga tayyorligini tasdiqladi.

OTB vakolatxonasi rahbari Kanokpan Lao-Araya:

- Biz mamlakatga qariyb 14 milliard AQSH dollari miqdorida sarmoya kiritdik va bu texnik yordamni o‘z ichiga olgan sarmoyamizning umumiy hajmi, xolos. Bizning faoliyatimiz O‘zbekistonning mintaqaviy va global qiymat zanjirlariga integratsiyalashuvi, ayniqsa, mamlakatning kelgusi yilda JSTga a’zo bo‘lish rejalarini hisobga olgan holda, investitsiyalar va savdoni rag‘batlantirishga qaratiladi, - deya mintaqaviy hamkorlikning muhimligini ta’kidladi.

Xorijiy investorlar kengashi kotibiyati rahbari Aziz G‘afurov investorlar tashabbuslari bo‘yicha muvaffaqiyatlar bilan o‘rtoqlashdi:

- Qisqa vaqt ichida biz 40 dan ortiq tashabbuslarni to‘pladik va ular bo‘yicha aniq natijalarga erishdik. Xorijiy investorlar kengashi biznes va davlat o‘rtasida ko‘prik bo‘lib, ushbu tashabbuslarning samarali amalga oshirilishini ta’minlaydi.

IHTTning sifat va to‘g‘ridan-to‘g‘ri xorijiy investitsiyalar ta’siri yo‘nalishi rahbari Fares Al-Hossami sohadagi huquqiy islohotlarning rolini qayd etarkan “Savdodan tashqari, OTB O‘zbekistonni investitsiya muhitini isloh qilishda faol qo‘llab-quvvatlamoqda. Masalan, hozirda barcha investorlar uchun teng sharoitlar yaratish maqsadida OTB davlat korxonalari ega bo‘lgan eksklyuziv eksport huquqlarini JST talablariga muvofiq qayta ko‘rib chiqmoqda,” dedi.

Investitsiyalar, sanoat va savdo vaziri maslahatchisi Abdulla Hoshimov O‘zbekistonning yosh aholisi va uning iqtisodiy o‘sish salohiyatiga e’tibor qaratdi:

- O‘zbekiston dunyodagi eng yosh davlatlardan biri bo‘lib, o‘rtacha yosh guruhi 28 yoshni tashkil etadi. Har yili 2 millionga yaqin yoshlar mehnat bozoriga kirib keladi. Ushbu demografik salohiyatga sarmoya kiritish juda muhim, aks holda u ijobiy emas, balki ko‘proq salbiy omilga aylanishi mumkin.

Sessiyada O‘zbekistonda amalga oshirilayotgan strategik islohotlar, ayniqsa, savdo, “yashil” energetika va raqamli o‘tish sohalarida barqaror iqtisodiy o‘sish uchun poydevor yaratayotgani ta’kidlandi. Mamlakatda qonunchilik bazasini takomillashtirish, xorijiy investitsiyalarni jalb etish va mintaqaviy hamkorlikni rivojlantirish bo‘yicha faol ishlar olib borilmoqda. Panel muhokamasi ishtirokchilari O‘zbekiston xalqaro investorlar uchun ishonchli va istiqbolli yo‘nalish bo‘lib qolayotgani holda 2030-yilga qadar o‘z maqsadlariga erishish yo‘lida ildamlayotganligini tasdiqladilar.