O‘zbekiston Respublikasi Investitsiyalar, sanoat va savdo vazirligi

O‘zbekiston Respublikasi Investitsiyalar, sanoat va savdo vazirligi muvofiqlashtiruvi ostida tashkil etilgan Toshkent xalqaro investitsiya forumining uchinchi kuni doirasida "Transport infratuzilmasi: Ipak yo‘lining zamonaviy yo‘nalishlari" mavzusida sessiya bo‘lib o‘tdi. U mintaqaviy transport tizimlarini modernizatsiya qilish, logistika imkoniyatlarini kengaytirish va xorijiy investitsiyalarni jalb etish masalalariga bag‘ishlandi.

O‘zbekiston transport vaziri o‘rinbosari Jasurbek Choriyev 2016 - yildan boshlab to‘liq transformatsiya yo‘li tufayli sohadagi vaziyat tubdan o‘zgarganini ta’kidladi.

Bugun ishonch bilan aytishimiz mumkinki, O‘zbekiston barcha yo‘nalishlarda yashil transport tomon harakatlanmoqda. Biz qurayotgan, ishlab chiqayotgan va amalga oshirayotgan barcha narsalar barqaror yechimlar bilan bog‘liq. Va bu jarayonda temir yo‘l transporti asosiy o‘rinni egallaydi. Biz 2025 - yil oxirigacha temir yo‘llarni to‘liq elektrlashtirishga erishishni maqsad qilganmiz," - deya qo‘shimcha qildi Jasurbek Choriyev.

Vazir o‘rinbosari, shuningdek, 2024 - yilda O‘zbekiston aviatsiyaning o‘sish sur’ati bo‘yicha birinchi o‘rinni egallaganini ma’lum qildi - 38 foiz. Transport xabi sifatida rejalashtirilgan Toshkentdagi yangi aeroport loyihasi ishlab chiqilmoqda.

Bu nafaqat O‘zbekiston, balki butun mintaqa uchun muhim loyiha, chunki biz Markaziy Osiyoning markazida joylashganmiz va dengizga chiqish imkoniyatiga ega emasmiz. Aviatsiya - ham yo‘lovchi, ham yuk tashish uchun strategik bo‘g‘in, - deya fikrlari bilan o’rtoqlashdi Jasurbek Choriyev.

Sessiyada avtomobil, temir yo‘l va aviatsiya sohalarini rivojlantirish imkoniyatlari, tartibga solish mexanizmlari, davlat-xususiy sheriklik asosida hamkorlik qilish yondashuvlari muhokama qilindi. Tadbirda Markaziy Osiyoda transport va logistika infratuzilmasining bugungi holati, uning istiqbollari, xorijiy investorlar uchun yaratilayotgan sharoitlarga e’tibor qaratildi.

Gruziya tashqi ishlar vaziri o‘rinbosari Aleksandr Xvitisashvilining so‘zlariga ko‘ra, transport yo‘laklarini rivojlantirish bo‘yicha muloqotda, birinchi navbatda, bir qator shartlarni hisobga olish kerak: mintaqa va mamlakatdagi barqarorlik, qonunchilik bazasi, infratuzilma loyihalari, shuningdek, yaxshi qo‘shnichilik va sherikchilik munosabatlari.

Yevropa investitsiya bankining kredit masalalari bo‘yicha yetakchi eksperti Davide Monguzzi bankning Markaziy Osiyodagi jismoniy ishtiroki mintaqadagi faoliyatini faollashtirish imkonini berishini ta’kidladi.

Biz o‘z vakolatxonamizni Samarqandda joylashtirish to‘g‘risidagi bitimni mamnuniyat bilan imzoladik. Bu yerda 10 yildan ortiq vaqtdan beri ishlayotgan bo‘lsak-da, hozirga kelib hamkorlikni yangi bosqichga olib chiqishni maqsad qilganmiz, - deya qo‘shimcha qildi Davide Monguzzi.

Devid Monguzzining fikriga ko‘ra, O‘zbekiston Markaziy Osiyoning yuragi, shuning uchun bu yerda infratuzilmani rivojlantirish strategik ahamiyatga ega. Mamlakat dengizga to‘g‘ridan-to‘g‘ri chiqish imkoniyatiga ega emasligini hisobga olgan holda, muqobil yo‘nalishlar: temir yo‘llar, avtomobil yo‘llari va aviatsiyani rivojlantirish muhimdir.

Osiyo taraqqiyot bankining xususiy sektor departamenti direktori Mayank Choudxari O‘zbekiston – transport koridoridagi markaziy bo‘g‘in ekanini ta’kidladi. Mamlakat 12 milliard dollardan ortiq sarmoya oldi, shundan 3 milliard dollardan ortig‘i OTBdan, asosan yo‘l va temir yo‘l infratuzilmasiga.

Biz nafaqat transport, temir yo’l va aviatsiya infratuzilmaga sarmoya kiritamiz. Savdoni soddalashtirish va raqamlashtirish ham muhim ustuvor yo‘nalishlardir. Biz tovarlar harakatini tezlashtirish va soddalashtirish uchun yagona oynalar yaratish, bojxona tartib-taomillari va nazorat-o‘tkazish punktlarini modernizatsiya qilish tarafdorimiz, - deya qo‘shimcha qildi Mayank Choudxari.

Boeing kompaniyasining Yevroosiyodagi sotuvlar bo‘yicha direktori Mario Antonio Ebchimning ta’kidlashicha, ilgari G‘arbda bo‘lgan sanoat epimarkazi endi Osiyo-Tinch okeani mintaqasiga ko‘chmoqda. Asosiy o‘sish, qiymat va iqtisodiy rivojlanish aynan shu yerda bo‘ladi.

2024 - yilda O‘zbekiston aviatsiyaning yuz yilligini nishonladi - birinchi parvoz va texnik baza yaratilishidan boshlab yuz yil o’tdi. Biz, o‘z navbatida, Uzbekistan Airways’ning hamkori ekanligimizdan va aynan bizning Boeing Dreamliner Markaziy Osiyoni Shimoliy Amerikaning eng yirik bozori - Nyu-York aeroporti bilan bog‘laganidan faxrlanamiz. Va biz allaqachon natijani ko‘rmoqdamiz - parvozlar soni barqaror o‘sib bormoqda," - deya qo‘shimcha qildi Mario Antonio Ebchim.

Shuningdek, spiker 2024 - yil avgust oyida Yevropa aeroportlari assotsiatsiyasi ma’lumotlariga ko‘ra, O‘zbekiston "Koviddan oldingi" 2019 - yilga nisbatan havo tashuvlarining o‘sish sur’ati bo‘yicha ikkinchi o‘rinni egallaganini ta’kidladi.

Egis kompaniyasining tijorat direktori Kadriye Baysal Markaziy Osiyo kompaniya uchun strategik jihatdan muhim mintaqa ekanligini ta’kidladi.

O‘zbekistonda DXSH loyihalarining muvaffaqiyatli namunalari allaqachon mavjud va biz, Egis, bunday modellarni rivojlantirish ustida faol ishlamoqdamiz, - deya qo‘shimcha qildi Kadriye Baysal.

Sessiyada muvaffaqiyatli loyihalarga asoslangan amaliy yechimlar taqdim etildi, investorlar uchun temir yo‘l, yo‘l va aviatsiya sohalaridagi bozor imkoniyatlari ko‘rib chiqildi.