O‘zbekiston Respublikasi Investitsiyalar, sanoat va savdo vazirligi

Toshkent Xalqaro Investitsiyalar Forumi davom etmoqda. Forumning ikkinchi kunida “Yangi O‘zbekistonning “Yashil” Rivojlanish Modeli: Atrof-muhit muammolarini hal etishda qayta tiklanadigan energiyaning o‘rni” mavzusidagi panel sessiyada qayta tiklanadigan energiya global va mintaqaviy ekologik muammolarni hal etishda qanday hissa qo‘sha olishi muhokama qilindi.

Tadbirga BCG boshqaruvchi hamkori Igor Alekseev moderatorlik qildi. Unda ta’kidlanishicha, yangi O‘zbekiston resurslardan samarali foydalanishga asoslangan, atrof-muhit barqarorligini ta’minlaydigan va iqtisodiy o‘sishni ko‘zlagan “yashil” rivojlanish modelini hayotga tatbiq etishni maqsad qilgan. Mamlakat innovatsion yechimlarni joriy etish uchun xorijiy investitsiyalar va hamkorliklarga ochiqdir.

Sessiya spikerlari:

— Vu Gan, “Goldwind” kompaniyasi boshqaruvi raisi

— Husayn Al-Novayis, “AMEA Power” kompaniyasi boshqaruvi raisi

— Iv Barlier, “EDF Renewables” kompaniyasi Markaziy Osiyo bo‘yicha vitse-prezidenti

— Abid Malik, “ACWA Power” kompaniyasining Markaziy Osiyo bo‘yicha prezidenti

— Rafael Barreau, “Masdar” kompaniyasining investitsiyalar bo‘yicha bosh direktori

Tadbir davomida qayta tiklanuvchi energiya manbalariga talab yaqin kelajakda yanada o‘sishi ta’kinlandi. Bu talabni qondirish uchun infratuzilmani keskin yaxshilash va malakali kadrlarni ko‘paytirish zarurligi qayd etildi.

O‘zbekiston energiya sektoriga 2035 yilga kelib qariyb 50 ming nafar muhandis, texnik, operator va raqamli IT mutaxassislari kerak bo‘ladi. Ekspertlar bunday qisqa muddatda malakali kadrlardan iborat katta ishchi kuchini yaratish masalalarini muhokama qildi.

“ACWA Power” kompaniyasining Markaziy Osiyo bo‘yicha prezidenti Abid Malik so‘zining boshida forum tashkilotchilariga rahmat aytdi va O‘zbekistonni futbol bo‘yicha Jahon Chempionatiga chiqqani bilan tabrikladi.

“Biz dunyodagi eng yirik tuzsizlantirilgan suv ishlab chiqaruvchilaridan birimiz, agar eng yirigi bo‘lmasak. Shu oy ichida O‘zbekistonda birinchi yashil vodorod loyihasini ishga tushiramiz. Bu mamlakatni yashil vodorod dunyosida boshqa darajaga olib chiqadi deb o‘ylaymiz”, — deya so‘zlarini davom ettirdi u.

Janob Abid Malik ACWA Power’dan tashqari “AMEA Power“, “Masdar”, “EDF Renewables” kabi dunyo bo‘ylab mashhur kompaniyalar O‘zbekistonga qayta tiklanuvchi energiya loyihalariga sarmoya kiritayotganini qayd etdi.

“Eng katta savol — nima uchun ular buni qilmoqda? Nega aynan O‘zbekiston? Dunyoda boshqa davlatlar ham bu kabi energiya loyihalarini qilishni xohlaydi, biroq buni amalga oshirolmayapti. Fikrimcha bu sarmayolarning asosiy sababi prezident Shavkat Mirziyoyev boshchiligida amalga oshirilayotgan islohotlardir. Jimjimador so‘zlar bilan sarmoya jalb qilish oson, lekin investitsiya amalga oshirish bosqichida bir qancha muammolar yuzaga kelishi mumkin. Hukumat esa ayrim davlatlardan farqli ravishda bu muammolarni hal qilishga doim tayyor turibdi. Menimcha barcha investorlarning bu yerga yig‘ilishiga ham asosiy sabab shu ishonch bo‘lsa kerak”, — deydi Abid Malik.

Yana bir nufuzli ishtirokchi “AMEA Power” kompaniyasi boshqaruvi raisi Husayn Al-Novayis O‘zbekistonda investorlarga kerak bo‘ladigan barqarorlik va qonunchilikning juda aniq doirasi mavjudligini ta’kidladi.

“Qonunchilik bazasi investorlar uchun juda muhim hisoblanadi. Bu ishonchni mustahkamlaydi, investor ish faoliyatini osonroq qiladi. O‘zbekistondagi qonunchilik bazasi juda qulay va biz bundan xursandmiz”, — deydi “AMEA Power” kompaniyasi boshqaruvi raisi.

Bundan tashqari ekspertlar tomonidan sohadagi muammolar va ularga yechimlar ham alohida muhokama qilindi. “EDF Renewables” kompaniyasi Markaziy Osiyo bo‘yicha vitse-prezidenti Iv Barlier qayta tiklanuvchi energiya manbalari bilan ishlash jarayonini tushuntirib berdi.

So‘nggi besh yil ichida O‘zbekiston energetika sohasiga qariyb 20 milliard AQSh dollari miqdorida xorijiy investitsiya jalb etdi va umumiy quvvati 9,6 GVt bo‘lgan zamonaviy energiya inshootlarini, jumladan, quyosh va shamol elektr stansiyalari hamda energiyani saqlash tizimlarini ishga tushirdi. Bu O‘zbekistonning barqaror kelajak sari yo‘lidagi ilk qadami hisoblanadi.