O‘zbekiston Respublikasi Investitsiyalar, sanoat va savdo vazirligi

Toshkent Xalqaro Investitsiyalar Forumining 10-iyun sanasidagi davra suhbatlaridan biri Markaziy Yevroosiyo mintaqasidagi raqamli o‘zgarishlarning asosiy jihatlariga qaratildi. “Innovatsiyalarni jadallashtirish: Markaziy Yevroosiyoda raqamli transformatsiyada venchur kapitalning roli” mavzusida tashkil etilgan panel sessiyada sun’iy intellekt, startap ekotizimi va transchegaraviy investitsiyalarning yangi imkoniyatlari keng muhokama qilindi.

Muloqotga “Biz Network” asoschisi Sardor Muhammadaliyev moderatorlik qildi.

Panelda ishtirok etgan ekspertlar:

• Robin Butler, “Sturgeon Capital” hamkori
• Alisher Djumanov, “AD Wealth” asoschisi va boshqaruvchi hamkori
• Tugra Musayeva, “Pasha Holding” innovatsiyalar bo‘yicha direktori
• Bakht Niyozov, “Most Holding” hammuassisi
• Davron Parmonov, “AloqaVentures” boshqaruv hamkori

So‘nggi besh yil ichida Markaziy Osiyoda startaplar va investorlar soni sezilarli darajada oshdi. Qozog‘istondagi Astana Hub, O‘zbekistondagi IT Park, Qirg‘izistondagi High Technology Park va Accelerator Prosperity kabi mintaqaviy akseleratorlar va startap-xablarning rivojlanishi ekotizimni yanada mustahkamladi.

Muloqot chog‘ida Markaziy Osiyoda venchur kapital bitimlari hajmi 2024-yilda 95 million dollargacha oshgani, bu 2023-yilga nisbatan 7 foizga ko‘p ekani ham ta’kidlandi.

“AloqaVentures” boshqaruv hamkori Davron Parmanovning aytishicha, hozirda O‘zbekistonda faoliyatini boshlagan “Startup Garage” bugun Saudiya Arabistoni, Marokash, Qatarda faoliyat yuritmoqda. Kelgusi oyda “Silk Road” tashabbusi doirasida AQShda yangi filialning ochilishi va mahalliy iste’dodlar yordamida yangi bozorlarni o‘zlashtirish rejalashtirilgan.

Ishtirokchilar mintaqaviy startap ekotizimi jadal o‘sish arafasida ekanligini ta’kidlab, venchur investitsiyalarining sun’iy intellekt va texnologik tadbirkorlikni rivojlantirishda katalizator sifatidagi rolini ta’kidladilar.

- 2018-yilda O‘zbekistonga kelganimizda hukumatning xalqaro investitsiyalar va islohotlarga, jumladan, valyuta bozorini liberallashtirishga ochiqligini ko‘rdik. O‘sha paytlarda “texnologiya” deganda ko‘pincha faqat “temir” tushunilardi. Hozir esa “AloqaVentures” va IT Park kabi kompaniyalarning bozorga kirib kelishi tufayli vaziyat tubdan o‘zgardi,  - dedi “Sturgeon Capital” hamkori Robin Butler.

Muloqot davomida, ayniqsa, transchegaraviy hamkorlik, angel investorlar va mintaqaviy fondlar orqali texnologiyalarni tijoratlashtirish hamda xalqaro maydonga olib chiqish strategiyalari muhim e’tibor markazida bo‘ldi.