O‘zbekiston Respublikasi Investitsiyalar, sanoat va savdo vazirligi

2025-yilgi Toshkent xalqaro investitsiya forumi dasturi doirasida “Sanoat: yangi salohiyatni kashf qilish” sessiyasida O‘zbekistondagi avtomobilsozlik, elektrotexnika va sanoat mashinasozligining istiqbollari muhokama qilindi.

Sessiyada qatnashganlar faqat O‘zbekistonda Amerika, Yevropa va Osiyodan kelgan vakillar birgalikda, mamlakatda biznesni qanday rivojlantirish va barcha davlatlar, raqobatga qaramay, umumiy manfaatlar yo‘lida rivojlanishga qanday hissa qo‘shishlari mumkinligini muhokama qilishayotganini ko‘rish mumkinligini ta’kidlashdi.

O‘zbekiston bozori ochiq va biz butun dunyodan yangi ishtirokchilarning kirib kelayotganini kuzatmoqdamiz. Yangi o‘yinchilarning faoliyatini ko‘rish haqiqatan ham qiziq. Ular odatiy qoliplarni buzmoqda: mahsulotni bozorga chiqarish muddatlari, avtomobillarda dasturiy ta’minotning roli haqidagi tasavvurlar o‘zgarmoqda. Bu kompaniyalar arzon narxlarda sifatli va innovatsion yechimlarni taklif qilmoqda, - dedi Boston Consulting Group boshqaruvchi direktori va hamkori Juzeppe Kollino.

BYD kompaniyasining Markaziy Osiyo bo‘yicha boshqaruvchi direktori Ivan Sao so‘nggi uch yil ichida BYD o‘z loyihasini uch bosqichda amalga oshirganini ma’lum qildi: avtomobillarni sotish, mahalliy yig‘ishga tayyorgarlik ko‘rish va to‘liq ishlab chiqarishni muvaffaqiyatli yo‘lga qo‘yish. 2024-yil dekabr oyida rasmiy marosim doirasida Jizzaxda korxona ochildi. Bugungi kunga qadar BYD O‘zbekiston hududida 10 000 dan ortiq elektromobil ishlab chiqardi. Ivan Sao bu nafaqat mahalliy iste’molchilarning o‘sib borayotgan talabini qondirish, balki mamlakatda ishlab chiqarish va sotish zanjirini rivojlantirishga ham xizmat qilishini ta’kidladi.

BYD avtomobil sanoatini modernizatsiya qilishga sezilarli hissa qo‘shmoqda deb hisoblayman va bu O‘zbekiston avtosanoati kelajagi uchun tanlangan o‘zgarishlar yo‘liga to‘liq mos keladi, - deya qo‘shimcha qildi Ivan Sao.

Markaziy Osiyo bo‘yicha BYD boshqaruvchi direktori o‘z so‘zida davom etib, BYD O‘zbekistonga zamonaviy texnologiyalar va yangi modellarni olib kelayotganini aytdi. Hozirgi kunga qadar kompaniya yettita elektromobil modelini taqdim etgan bo‘lib, 2025-yilda boshqa yangi modellarni ham ishga tushirishni rejalashtirmoqda. Bundan tashqari, 1500 dan ortiq yuqori malakali ish o‘rinlari yaratilgan. Uning ta’kidlashicha, bu qadamlarning barchasi O‘zbekistonni avtomobilsozlik sanoati uchun jozibador taraqqiyot markaziga va avtosanoatga xalqaro investitsiyalarni jalb qiluvchi “magnit”ga aylantirishga qaratilgan.

Ishtirokchilar O‘zbekistonning sanoat salohiyati, zamonaviy ishlab chiqarish texnologiyalari, xorijiy investorlar uchun yaratilgan qulay shart-sharoitlar, yuqori texnologiyali yangi tarmoqlarni rivojlantirishga qaratilgan strategiyalar haqida fikr almashdilar. Shuningdek, avtomobil sanoatining yetakchi kompaniyalari bilan hamkorlik qilish, yangi ish o‘rinlari yaratish, eksport salohiyatini oshirish, “yashil” texnologiyalar asosida sanoat klasterlarini shakllantirish istiqbollari keng yoritildi.

O‘zbekistondagi CNH Industrial kompaniyasining bosh boshqaruvchisi Oybek Burxonov bozor va ta’minot zanjiridagi bugungi vaziyat ularga strategiyani qayta ko‘rib chiqish imkonini berganini aytdi. Xususan, bir qator mahsulotlar - dori-darmonlar va mahalliy kompaniyalar tomonidan ishlab chiqarilgan mahsulotlar bo‘yicha O‘zbekiston raqobatbardosh mamlakatga aylangan.

Biz ishlab chiqarish jarayonlarini tashkil etish orqali qo‘shimcha qiymat yaratish haqida ham so‘z yuritmoqdamiz. Bu sohada 25 yildan ortiq tajribamiz bor. Biz shunchaki ish o‘rinlari yaratib qolmay, xodimlarni ruhlantiramiz va ular nafaqat ishlab chiqarishi, balki qo‘shimcha qiymat yaratishi uchun sharoit yaratamiz, - dedi Oybek Burxonov.

Global Neighbours raisi Yovanka Porshe Xitoydan Markaziy Osiyo orqali Yevropaga poyezdda sayohat qilish rejalari haqida ma’lumot berdi. Bu o‘ziga xos tadqiqot missiyasi bo‘lib, Xitoy tomoni va boshqa ishtirokchilar uchun investitsiya imkoniyatlarini aniqlashga qaratilgan.

Fikrimcha, eng muhimi - bu madaniyatdir. Sun’iy intellekt haqidagi bahslar orasida madaniyat ko‘pincha yetarlicha baholanmaydi va kam e’tibor beriladi, ayniqsa, bu yerdagidek boy madaniyat. Bizning poyezdimiz o‘ziga xos ko‘chma Jahon iqtisodiy forumiga aylanadi: biz konferensiyalar o‘tkazamiz, olimlar, siyosatchilar, tadbirkorlar, shuningdek, san’atkorlarni ham jamlaymiz. Butun yo‘nalish bo‘ylab tadbirlar rejalashtirilgan poyezd Xitoydan yo‘lga chiqadi va Germaniyada o‘z yo‘lini yakunlaydi, - deya qo‘shimcha qildi Yovanka Porshe.

Shuningdek, sessiya davomida O‘zbekistonda yangi sanoat yo‘nalishlarini rivojlantiradigan imkoniyatlar, investitsiyalarni jalb qilish mexanizmlari va davlat tomonidan ko‘rsatilayotgan institutsional qo‘llab-quvvatlash choralari haqida muhim ma’lumotlar taqdim etildi.