O‘zbekiston Respublikasi Investitsiyalar, sanoat va savdo vazirligi

Joriy yilning 24-aprel kuni O‘zbekiston Respublikasi investitsiyalar, sanoat va savdo vaziri Laziz Kudratov tomonidan Qoraqalpog‘iston Respublikasining savdo-iqtisodiy, sanoat va sarmoyaviy salohiyatini yuksaltirishga qaratilgan qator kompleks tadbirlar o‘tkazildi.

Dastlab Qoraqalpog‘iston Respublikasining 17 ta tuman hokimining investisiya masalalari bo‘yicha o‘rinbosarlari ishtirokidagi yig‘ilish bo‘lib o‘tdi va ular o‘zlariga ishonib topshirilgan hududlarda amalga oshirilayotgan investisiya loyihalari, yuzaga kelayotgan masala va muammolar yuzasidan hisobot qildilar. Har bir ko‘tarilgan masala yuzasidan aniq qaror qabul qilinib, muddatlar belgilanib, mahalliy hokimliklar va vazirlik vakillaridan mas’ul xodimlar tayinlandi.

Tashrif dasturiga ko‘ra, Laziz Kudratov Qoraqalpog‘istonning Qorao‘zak tumanida ham bo‘lib, S.Kamolov nomidagi, Qo‘yboq, Quralpa, Qorao‘zok mahalla fuqarolar yig‘inlari rahbarlari bilan uchrashuvlar o‘tkazdi, aholini qiynayotgan dolzarb masalalar va ularni tegishli hududga mos investitsiya loyihalarini amalga oshirish asosida hal etish yo‘llarini muhokama qildi.

Aholi tomonidan ko‘tarilgan masalalar qatorida yo‘llar, issiqxonalar qurish, quyosh batareyalari o‘rnatish, nasos stansiyalarini o‘rnatish va boshqa infratuzilmaviy masalalar, chorvachilik va parrandachilik loyihalarini amalga oshirishga ko‘maklashish kabilar bor edi. Ko‘tarilgan barcha masalalar bo‘yicha vaziyatdan kelib chiqib hamda hududlar imkoniyatlarini tahlil qilingan holda muammolarni hal etishning amaliy yo‘llari ko‘rsatilgan “Yo‘l xaritasi” ishlab chiqildi.

Ishchi tashrif yakunida vazir respublikada amalga oshirilayotgan yirik investitsiya loyihalari bilan tanishdi. Joriy ishlarning borishi, belgilangan jadvallarga rioya etilishi o‘rganilib, obyektlarni ishga tushirishni jadallashtirish bo‘yicha zarur chora-tadbirlar ishlab chiqildi.

Sayyor qabul yakunlari bo‘yicha fuqarolarning tizimli muammolarini hal etish, loyihalar ijrosini susaytirayotgan muammolarni bartaraf etishga qaratilgan chora-tadbirlar ishlab chiqilib, mas’ul ijrochilar tomonidan har hafta bajarilgan ishlarning borishi yuzasidan hisobot berish mexanizmi joriy etildi.