ISSV xodimlari loyiha boshqaruvi sertifikatlarini oldilar
2024-12-20 09:00:00 / Yangiliklar
20-dekabr kuni Investitsiyalar, sanoat va savdo vazirligida Irlandiyaning «Saviday» konsalting kompaniyasi tizimi bo‘yicha loyihalarni amalga oshirish jarayonlarini boshqarish ko‘nikmalarini o‘rgangan xodimlarni taqdirlash marosimi bo‘lib o‘tdi.
Tadbirni vazir o‘rinbosari Shoxrux Gulamov ochib berdi. U «Saviday» kompaniyasi vakillariga kurslarni samarali tashkil etgani uchun minnatdorlik bildirdi va xodimlar tomonidan o‘zlashtirilgan ko‘nikmalar amaliy faoliyatda qo‘l kelishiga, mamlakat rahbariyati tomonidan belgilangan maqsad va vazifalarga erishish doirasida ham individual, ham idoraviy ko‘rsatkichlarni oshirishga xizmat qilishiga ishonch bildirdi.
3 haftalik kurs dasturi 8 moduldan iborat bo‘lib, investorlar bilan ishlash, muzokaralar olib borish, to‘g‘ridan-to‘g‘ri xorijiy investitsiyalarni jalb qilish va o‘zlashtirish va boshqa jarayonlarni o‘z ichiga oldi.
Kurslar kompaniya tomonidan investorlarni jalb qilish va qo‘llab-quvvatlash, loyihalarni ishlab chiqish va ularning bajarilishini monitoring qilish, investitsiya muhitini yaxshilash yo‘nalishlarida faoliyat yuritayotgan xodimlar va ISSVning boshqa tegishli boshqarmalari uchun tashkil etildi.
Tadbir yakunlariga ko‘ra, o‘quv dasturida faol ishtirok etgan 75 nafar rahbar va xodim sertifikatlar bilan taqdirlandi.
Ma’lumot uchun: «Saviday» keng ko‘lamli islohotlarni amalga oshirayotgan davlatlarda, jumladan, Yaqin Sharq va Osiyo mamlakatlarida konsalting xizmatlarini ko‘rsatish bo‘yicha ko‘p yillik tajribaga ega. Kompaniyaning shtab-kvartirasi Irlandiyaning Dublin shahrida joylashgan. «Saviday» strategik loyihalarni amalga oshirish, iqtisodiy zonalarni rivojlantirish, kichik va o‘rta biznesni qo‘llab-quvvatlash, eksport, marketing tadqiqotlari, innovatsiyalar hamda ma’muriy tartibga solish masalalari bo‘yicha konsalting xizmatlarini ko‘rsatib keladi.