O‘zbekiston Respublikasi Investitsiyalar, sanoat va savdo vazirligi

10-dekabr kuni Toshkent Davlat sharqshunoslik universitetida Kuzatuv kengashining sakkizinchi yig‘ilishi bo‘lib o‘tdi. Tadbirda Kengash a’zolari, vazirlik va idoralar rahbarlari hamda universitet ma’muriyati vakillari ishtirok etdilar. Yig‘ilishga O‘zbekiston Respublikasi Investitsiyalar, sanoat va savdo vaziri, Kuzatuv kengashi raisi Laziz Kudratov raislik qildi.

Yig‘ilish davomida rektor Gulnora Rixsiyevaning 2025-yilda universitet faoliyati natijalari hamda 2026-yil uchun rejalar haqidagi hisobotlari tinglandi. Ta’kidlanganidek, o‘tgan yilda muassasaning moliyaviy barqarorligi ta’minlandi, yangi ta’lim dasturlari joriy etildi va ilmiy-tadqiqot ko‘rsatkichlari o‘sdi.

Shuningdek, tashkiliy va kadrlar masalalariga alohida e’tibor qaratildi. Ishtirokchilar o‘quv ishlari va xalqaro aloqalar bo‘yicha yangi prorektorlar nomzodlarini ko‘rib chiqib, tegishli qarorlarni qabul qildilar. Ta’lim sifatini oshirish va yuqori malakali mutaxassislar tayyorlashni davom ettirish zarurligi alohida qayd etildi.