O‘zbekiston Respublikasi Investitsiyalar, sanoat va savdo vazirligi

“IT-PARK Uzbekistan: yangi rivojlanish istiqbollari” mavzusidagi panel sessiyasida O‘zbekistonni 2030 yilgacha mintaqaviy axborot texnologiyalari markaziga aylantirish rejalari taqdim etildi. Sessiyaning moderatori sifatida IT Park bo‘limi boshlig‘i Kamolaxon Ro‘zmetova ishtirok etdi.

O‘zbekiston raqamli texnologiyalar vaziri Sherzod Shermatov so‘nggi sarmoyalarning ahamiyati bilan o‘rtoqlashdi: “Kecha biz muhim voqea – yirik to‘g‘ridan-to‘g‘ri xorijiy investitsiya loyihasi bo‘lgan Data Volt’dan 5 milliard dollarlik yashil ma’lumotlar markazi qurilishi boshlanganiga guvoh bo‘ldik. Biz IT-kompaniyalar uchun qulay muhit yaratyapmiz va O‘zbekistonda ofislarni ochish bilan bog‘liq barcha xavflarni oldini olish uchun “Nol risk” dasturini ishga tushirmoqdamiz”.

“IT-Park Uzbekistan” kompaniyasi direktori Farhod Ibragimov loyihaning ko‘lamini ta’kidladi: “Hozirda IT-parkda 2 mingga yaqin kompaniya ro‘yxatdan o‘tgan, ularning aksariyati eksportga yo‘naltirilgan. Yil oxirigacha “Enterprise Uzbekistan” loyihasini ishga tushirish rejalashtirilgan – bu xorijiy kompaniyalarni o‘z mamlakatlarida o‘rganib qolgan qonun va tartiblar bilan ta’minlashga qaratilgan. Loyiha maʼlumotlar maxfiyligi, intellektual mulk, bank ishi, valyutani tartibga solish, soliq va mehnat munosabatlari kabi sohalarga eʼtibor qaratadi”.

IT-Park boʻlimi boshligʻi Gulnoza Sultonova huquqiy yordamga alohida urgʻu berdi: “Oʻzbekistonda tadbirkorlik faoliyatini boshlash uchun huquqiy shaklni tanlash, hujjatlarni tayyorlash va boshlangʻich xarajatlar, jumladan, ijara va ish haqini hisoblash kerak”. Sessiyada 2030-yilgacha IT-xizmatlar va dasturiy mahsulotlar eksportini 5 milliard AQSH dollariga yetkazish boʻyicha vazifalar belgilab olindi. Ushbu muhokama O‘zbekistonning IT-sohasidagi investitsiya loyihalari va imkoniyatlarini o‘rganish uchun o‘ziga xos platforma bo‘lib, mamlakat IT-infratuzilmasini rivojlantirishda sezilarli yutuqlarga erishilgani ta’kidlandi.