“Yangi Toshkent” 1 milliondan ortiq aholi uchun qulay va zamonaviy muhit yaratadi
2024-05-02 16:45:00 / Yangiliklar
Dunyo bo‘ylab shaharlar aholi o‘sishi va iqtisodiy rivojlanish bilan bog‘liq muammolarga duch kelmoqda. Kuchli iqtisodiy o‘sish qo‘shimcha mehnat resurslarini talab qiladi, bu esa aholining tez o‘sishiga olib keladi.
Toshkent uchun jahon bozorlariga chiqish yo‘lidagi birinchi qadam “Tashkent City” loyihasi bo‘lib, u shaharning murakkab loyihalarini boshqarish qobiliyatini namoyish etdi. Keyingi qadam 1 milliondan ortiq aholi uchun qulay va zamonaviy muhit yaratishga mo‘ljallangan “Yangi Toshkent” loyihasi bo‘ldi.
Panel sessiyasida ekspertlar “Yangi Toshkent” va eski shahar oʻrtasidagi sinergiyani taʼminlash, resurslar chiqib ketishining oldini olish, Oʻzbekistonga xalqaro sarmoya va tajribani jalb qilishga koʻmaklashish masalalarini muhokama qildi.
O‘zbekiston Qurilish va uy-joy kommunal xizmat ko‘rsatish vaziri o‘rinbosari Davron Odilov yangi loyihalarning hudud uchun muhimligini ta’kidladi.
“Toshkent Markaziy Osiyodagi biznes, ommaviy axborot vositalari va ilm-fan uchun rivojlangan infratuzilmaga ega eng yirik shaharga aylanmoqda. Biz 200 ming daraxt ekish va 7 ta ko‘prik qurishni rejalashtirganmiz, bu esa shahar muhitini sezilarli darajada yaxshilaydi.”
Toshkent shahar hokimi o‘rinbosari Sharaf Rahmonov xorijiy investitsiyalar o‘sishi haqida gapirdi:
“2017-yildan buyon to‘g‘ridan-to‘g‘ri xorijiy investitsiyalar hajmi uch baravar ko‘paydi, bu esa bugungi kunda Toshkent shahrida 10 milliard dollarlik 1000 dan ortiq investisiya loyihasi amalga oshirilayotganidan dalolatdir.”
“Toshkent invest” AJ raisi o‘rinbosari Rustam Qodirov byurokratik to‘siqlarga e’tibor qaratdi:
"Biz Oʻzbekistonga sarmoya kiritish jarayonini soddalashtirish uchun byurokratiya darajasini pasaytirish boʻyicha faol ishlamoqdamiz. Maqsadimiz xorijiy investorlarga qulaylik maqsadida ‘yagona darcha’ yaratish”.
Sessiyada “Yangi Toshkent”ni shaharning tarixiy qismi bilan integratsiya qilish muhimligi, shuningdek, O‘zbekiston poytaxtini barqaror rivojlantirish uchun resurslarni tejash va xalqaro tajribani jalb qilish zarurligi ta’kidlandi.