Qurilish va uy-joy kommunal xo'jaligi sohasida nazorat qilish inspeksiyasi (MUNOSABAT)
2025-05-16 11:00:00 / Rasmiy munosabat
Ijtimoiy tarmoqlarda e'lon qilingan poytaxtimizning Olmazor tumani Sag'bon 30-berk ko'chasidagi qurilish obyekti bo'yicha Qurilish va uy-joy kommunal xo'jaligi sohasida nazorat qilish inspeksiyasi tomonidan quyidagilar ma'lum qilinadi:
Buyurtmachi “BAURAUM GROUP” MCHJ tomonidan qurilish obyekti fuqaro K.Olimovga oʻtkazilgan. Shundan soʻng K.Olimov mansardali koʻp qavatli turar joy binolarini qurish maqsadida shaharsozlik hujjatlarini rasmiylashtirish ishlarini boshlagan.
Obyekt uchun:
- 2024-yil 15-iyul kuni Arxitektura va shaharsozlik kengashining ishchi organi tomonidan 117932422-sonli xulosa berilgan.
- “Shaharsozlik hujjatlarini ekspertiza qilish Respublika markazi” DM tomonidan 2024-yil 3-oktabrda yigʻma ijobiy ekspertiza xulosasi taqdim etilgan.
Mazkur hujjatlar asosida 2024-yil 21-oktabr kuni xabarnoma orqali nazorat inspeksiyasiga bildirishnoma yuborilib, obyekt rasmiy roʻyxatdan oʻtkazilgan. Shundan soʻng buyurtmachi tomonidan qurilish-montaj ishlari boshlab yuborilgan. Biroq ayrim fuqarolar bu holatdan norozi boʻlib, Toshkent tumanlararo maʼmuriy sudiga ariza bilan murojaat qilgan va Kengashning yuqoridagi xulosasini haqiqiy emas deb topishni soʻragan.
Toshkent shahar maʼmuriy sudining 2025-yil 20-martdagi qaroriga koʻra 2024-yil 15-iyulda berilgan Arxitektura va shaharsozlik kengashining ishchi organi xulosasi haqiqiy emas deb topilgan. Ushbu sud qaroridan soʻng Toshkent shahar Qurilish va uy-joy kommunal xoʻjaligi sohasida hududiy nazorat qilish inspeksiyasi tomonidan 2025-yil 17 va 26-mart kunlari yozma koʻrsatmalar berilib, qurilish-montaj ishlarini vaqtincha toʻxtatish belgilangan.
Xususan, inspeksiya rahbari tomonidan 2024-yil 14-aprel kuni ichki buyruq rasmiylashtirilib, qurilishga ruxsat beruvchi 155260952-sonli bildirishnoma nazorat.mc.uz elektron platformasida muzlatilgan holatga oʻtkazilgan. Bu haqda buyurtmachi K.Olimovga 2025-yil 14-aprel kuni 5853-sonli ogohlantirish xati yuborilgan. K.Olimov mazkur holat yuzasidan Toshkent shahar Maʼmuriy sudiga shikoyat arizasi bilan murojaat qilgan. Sud tomonidan 2024-yil 25-noyabrda chiqarilgan hal qiluvchi qaror oʻz kuchida qoldirilgan va Kengash xulosasini haqiqiy emas deb topish boʻyicha berilgan shikoyat rad etilgan.