Qurilish sohasida faoliyat yuritayotgan tadbirkorlar bilan ochiq muloqot o‘tkazildi
2026-06-01 21:30:00 / Vazirlik yangiliklar
Samarqand va Navoiy viloyatlarida qurilish hamda uy-joy kommunal xo‘jaligi sohasida faoliyat yuritayotgan tadbirkorlar bilan ochiq muloqot o‘tkazildi.
Vazir o‘rinbosari Ozoda Jo‘rayeva boshchiligida tashkil etilgan ochiq muloqotda vazirlik mas’ullari, hududiy tashkilotlar rahbarlari hamda tadbirkorlar ishtirok etdi.
Muloqot davomida sohada faoliyat yuritayotgan tadbirkorlar tomonidan amaliyotda uchrayotgan muammolar, mavjud kamchiliklar va ularni bartaraf etish yuzasidan takliflar bildirildi. Xususan, shaharsozlik hujjatlarini rasmiylashtirish, loyiha va ekspertiza jarayonlari, qurilish-montaj ishlari, noqonuniy qurilmalar hamda boshqa dolzarb masalalar muhokama qilindi.
- Sohada tadbirkorlik faoliyatini qo‘llab-quvvatlash, ularning muammo va takliflarini eshitish hamda tezkor yechim topish vazirlik faoliyatining ustuvor yo‘nalishlaridan biridir. Tadbirkorlar bilan ochiq va doimiy muloqot sohadagi mavjud masalalarni o‘z vaqtida bartaraf etish hamda ishbilarmonlik muhitini yanada yaxshilashga xizmat qiladi,- deya ta'kidladi vazir o'rinbosari.
Ochiq muloqot davomida ko‘tarilgan murojaat va takliflar yuzasidan mutasaddilar tomonidan tegishli tushuntirishlar berildi hamda ularni belgilangan tartibda ko‘rib chiqish bo‘yicha mas’ullarga topshiriqlar berildi.