Vazir o‘rinbosari Ozoda Jo‘rayeva xizmat safari bilan Farg‘ona viloyatida bo‘ldi
2026-05-07 15:00:00 / Vazirlik yangiliklar
Vazir o‘rinbosari Ozoda Jo‘rayeva xizmat safari bilan Farg‘ona viloyatida bo‘lib, hududda amalga oshirilayotgan qurilish va kommunal sohadagi islohotlar jarayonini tanqidiy-tahliliy ruhda o‘rganmoqda.
Dastlab vazir o‘rinbosari Farg‘ona viloyati Qurilish va uy-joy kommunal xo‘jaligi bosh boshqarmasida bo‘lib, davlat dasturlari ijrosi, ko‘p qavatli uy-joy fondini saqlash, ichimlik suvi va oqova tizimlari holati, aholiga ko‘rsatilayotgan kommunal xizmatlar sifati hamda murojaatlar bilan ishlash tizimi yuzasidan olib borilayotgan ishlar bilan yaqindan tanishdi.
Shuningdek, maxsus ishchi guruh tomonidan hududlarda amalga oshirilgan o‘rganishlar natijalari, mavjud muammolar va ularning kelib chiqish sabablari batafsil muhokama qilindi. Ayrim yo‘nalishlarda sustkashlikka yo‘l qo‘yilgani, ijro intizomi talab darajasida emasligi, murojaatlar bilan ishlashda mas’uliyatsizlik holatlari mavjudligi keskin tanqid ostiga olindi.
Mas’ullarga aniqlangan kamchiliklarni qisqa muddatlarda bartaraf etish, aholi uchun qulay va sifatli kommunal xizmatlarni tashkil etish, har bir murojaatga mas’uliyat bilan yondashish yuzasidan aniq topshiriqlar berildi. O‘z vazifasiga sovuqqonlik bilan yondashgan mutasaddilar qat’iy ogohlantirildi.
- Bugungi islohotlardan asosiy maqsad aholining hayot sifatini yaxshilashdir. Har bir rahbar o‘z faoliyatiga mas’uliyat bilan yondashmasa, tizimdagi o‘zgarishlar samara bermaydi. Eng muhimi, odamlarning murojaati ortida ularning muammosi, ishonchi va ertangi kunga bo‘lgan umidi turibdi. Shu sababli har bir murojaat va har bir vazifa ijrosi qat’iy nazoratda bo‘lishi kerak,- dedi Ozoda Jo’rayeva.
Yig‘ilish davomida kelgusidagi ustuvor vazifalar, hududlarda belgilangan ishlarni jadallashtirish, infratuzilma obyektlariga sifatli xizmat ko’rsatish hamda tizimda ochiqlik va nazoratni kuchaytirish masalalari muhokama qilindi.