Qurilish va uy-joy kommunal xo‘jaligi vazirligida ustuvor vazifalar muhokama qilindi
2026-04-16 09:30:00 / Vazirlik yangiliklar
Vazirlikda Prezidentimiz raisligida o‘tkazilgan videoselektor yig‘ilishida belgilangan topshiriqlar ijrosiga bag‘ishlangan yig‘ilish bo‘lib o‘tdi.
Unda Qurilish va uy-joy kommunal xo‘jaligi vaziri, uning o‘rinbosarlari, markaziy apparat va hududiy boshqarmalar, tizim tashkilotlari rahbarlari ishtirok etdi.
“Uy-joy qurilishi va urbanizatsiya sohasida amalga oshirilayotgan ishlar va kelgusidagi ustuvor vazifalar”ga bag‘ishlangan videoselektor yig‘ilishida davlatimiz rahbari tomonidan qurilish sohasining iqtisodiyotdagi o‘rni, uning samarasi hamda aholi bandligini ta’minlashdagi ahamiyati alohida ta’kidlangan edi. Shu nuqtayi nazardan, bugungi yig‘ilishda sohadagi islohotlarni yangi bosqichga olib chiqish, jarayonlarni soddalashtirish va ortiqcha burokratik to‘siqlarni bartaraf etish masalalari ustuvor vazifa sifatida belgilandi. Xususan, tizimni to‘liq raqamlashtirish, inson omilini keskin qisqartirish va barcha xizmatlarni shaffof elektron shaklga o‘tkazish bo‘yicha aniq topshiriqlar berildi.
Xususan, murojaatlar bilan ishlash masalasiga alohida e’tibor qaratildi. Yurtboshimiz boshchiligida o'tkazilgan videoselektorda qayd etilganidek, aholi va tadbirkorlar murojaatlarini tezkor va adolatli ko‘rib chiqish tizimini yaratish dolzarb vazifa hisoblanadi. Shu bois, sohada sun’iy intellekt texnologiyalarini joriy qilish, murojaatlarni tahlil qilish va nazorat qilishni avtomatlashtirish hamda barcha darajadagi rahbarlarning shaxsiy mas’uliyatini kuchaytirish bo‘yicha ko‘rsatmalar berildi.
Shuningdek, qurilish sohasida faoliyat yuritayotgan tadbirkor va quruvchilarni qiynayotgan muammolarni chuqur o‘rganish masalasiga ham alohida to‘xtalib o‘tildi. Bu borada mas’ullarga aniq takliflar ishlab chiqish vazifasi qo‘yildi.
Yakunda ijro intizomini mustahkamlash, belgilangan vazifalarni o‘z vaqtida va sifatli bajarish har bir rahbarning shaxsiy javobgarligi ekani ta’kidlandi.