Vazir o‘rinbosari boshchiligidagi delegatsiya Yaponiyada infratuzilmani modernizatsiya qilishni o‘rganmoqda
2026-04-01 10:00:00 / Vazirlik yangiliklar
Vazir o‘rinbosari Ozoda Jo‘rayeva boshchiligidagi delegatsiyaning Yaponiyaga tashrifi doirasida infratuzilmani modernizatsiya qilish va uni samarali boshqarish bo‘yicha ilg‘or yondashuvlar o‘rganilmoqda.
Xususan, Mitsubishi Corporation tomonidan kommunal va shahar infratuzilmasini rivojlantirishga qaratilgan davlat-xususiy sheriklik loyihalari taqdimoti o‘tkazildi. Unda infratuzilmani loyihalash, moliyalashtirish, qurish va ekspluatatsiya qilishning zamonaviy mexanizmlari batafsil yoritildi.
Taqdimotda infratuzilma obyektlarini boshqarishda integratsiyalashgan yondashuv — ya’ni suv ta’minoti, oqova tizimlari, energetika va raqamli monitoringni yagona tizimga birlashtirish masalalari alohida ta’kidlandi. Bu esa nafaqat tizim barqarorligini oshiradi, balki xizmatlar uzluksizligini ham ta’minlaydi.
Ushbu model infratuzilma sohasida o‘z samaradorligini ko‘rsatib, davlat zimmasida strategik boshqaruvni saqlagan holda, xususiy sektor orqali obyektlarning texnik yangilanishi va ekspluatatsiya sifatini oshirish imkonini berayotgani qayd etildi.
Ta’kidlash lozimki, ilg‘or infratuzilma yechimlarini o‘rganish va milliy sharoitga moslashtirish orqali mamlakatimizda kommunal tarmoqlarni modernizatsiya qilish, resurslardan samarali foydalanish va aholiga ko‘rsatilayotgan xizmatlar sifatini yangi bosqichga olib chiqish uchun mustahkam zamin yaratilmoqda.