O‘zbekiston Respublikasi Qurilish va uy-joy kommunal xo‘jaligi vazirligi

O‘zbekiston Respublikasi Vazirlar Mahkamasining 431-son qarori ijrosini ta’minlash maqsadida Arxitektura va qurilish sohasi Faxriylar kengashi raisi K.Tulyaganov tomonidan O‘zbekiston Respublikasi Prezidenti Administratsiyasi huzuridagi “Qurilish birlashmasi” DUK tarkibidagi 5 ta yo‘nalish bo‘yicha faoliyat yuritayotgan tarkibiy boshqarmalarda mehnat qilayotgan faxriylar ishtirokida davra suhbatlari tashkil etildi.

Mazkur tadbirlarda Faxriylar kengashiga yuklatilgan vazifalardan kelib chiqib, arxitektura va qurilish sohasini yanada rivojlantirishga qaratilgan muhim taklif va tashabbuslar muhokama qilindi. Xususan, sohani jadal rivojlantirish jarayonida faxriylarning boy kasbiy tajribasi, amaliy bilimlari hamda intellektual salohiyatidan samarali foydalanish masalalariga alohida e’tibor qaratildi.

Shuningdek, zamonaviy talablar va innovatsion yondashuvlarni amaliyotga keng joriy etish, milliy arxitektura va madaniy merosni asrab-avaylash hamda uni rivojlantirish bo‘yicha takliflar ilgari surildi. Shahar hududlaridan oqilona va samarali foydalanish, aholi punktlarini arxitektura-rejalashtirishda ilg‘or tajribalarni qo‘llash yuzasidan amaliy tavsiyalar ishlab chiqish zarurligi ta’kidlandi.

Davra suhbatlarida faxriylarning ma’naviy ehtiyojlarini inobatga olish, ularning qonuniy huquq va manfaatlarini himoya qilish, munosib turmush darajasini ta’minlash hamda jamiyatdagi ijtimoiy mavqeini mustahkamlash masalalari ham muhokama etildi. Bu borada tegishli tashkilotlar bilan o‘zaro hamkorlikni yanada kuchaytirish lozimligi qayd etildi.

Tadbir yakunida arxitektura va qurilish sohalarida faoliyat yuritgan faxriylarni ijtimoiy qo‘llab-quvvatlash, mavjud dolzarb muammolarni aniqlash va ularni bartaraf etish jarayonlariga faxriylarni faol jalb etish bo‘yicha aniq takliflar bildirildi. Ushbu takliflar kelgusida sohani rivojlantirishga qaratilgan dastur va chora-tadbirlarni ishlab chiqishda inobatga olinishi belgilandi.