Sohada mas’uliyat va natijaga qat’iy talab qo'yiladi
2026-02-06 15:00:00 / Vazirlik yangiliklar
Kommunal soha — bu millionlab aholining kundalik hayoti, xavfsizligi va davlatga bo‘lgan ishonchini belgilab beruvchi muhim tarmoq hisoblanadi. So‘nggi yillarda mazkur sohani rivojlantirish uchun katta imkoniyatlar, salmoqli mablag‘lar va keng vakolatlar berilmoqda. Biroq ayrim holatlarda bu imkoniyatlar tartib o‘rnatishga emas, balki mas’uliyatsizlik, loqaydlik va faqat “qog‘ozda ishlash”ga yo‘naltirilmoqda.
Bugun vazir o‘rinbosari Ozoda Jo‘rayeva boshchiligida kommunal sohada amalga oshirilayotgan ishlar, mavjud kamchiliklar tahlili va ahamiyati dolzarb bo‘lgan vazifalarga bag‘ishlangan yig‘ilish bo‘lib o‘tdi. Unda vazirlikning tizim tashkilotlari va hududiy boshqarmalari vakillari onlayn ishtirok etdilar.
— Hurmatli Prezidentimiz kommunal sohaning naqadar mashaqqatli ekani, aholi oldidagi juda katta mas’uliyatini chuqur anglagan holda ushbu tizimga alohida e’tibor qaratmoqdalar. Soha uchun yetarlicha imkoniyatlar, qo‘shimcha shtat birliklari va salmoqli moliyaviy resurslar ajratilmoqda. Biroq, afsuski, ayrim "guruch ichidagi kurmaklar" tufayli islohotlarimiz sur’atida oqsoqlik sezilmoqda. Ushbu holatni hech narsa bilan oqlab bo‘lmaydi. Bu ishonchni suiiste’mol qilish degani.
Bir narsani hamma yaxshilab tushunib olishi kerak: berilgan har bir imtiyoz, har bir imkoniyat va har bir so‘mning qat’iy so‘rovi bor. Siz, avvalo, xalq oldida, keyin esa davlat oldida javobgarsiz”, — dedi Ozoda Jo‘rayeva.
Ta’kidlanganidek, ba’zi hududlarda raqamlashtirish faqat qog‘ozda, ko‘p qavatli uylar esa nazoratsiz. “Turar joy” milliy axborot tizimi joriy etilgan, ammo Qoraqalpog‘iston Respublikasining ayrim hududlari, Qarshi, Namangan, Farg‘ona shaharlaridagi uylar to'liq tizimga kiritilmagan. Aholi murojaatlari ham ba’zi hududlarda shunchaki rasmiyatchilik sifatida qaraladi. Muammoning ichiga kirish, xalq dardini bartaraf qilish ishlariga yetarlicha e’tibor qaratilmaydi. Oqibatda 2025-yilda takroriy murojaatlar soni 33 foizga ortgan.
— Bizda xato kechirilmaydi, muammo bormi, borib o‘rganish va tahlil qilish kerak. Chunki bu yerda odamlarning xavfsizligi turibdi. Lekin ayrim “uddaburonlar” muammoni bartaraf etish o‘rniga, bizga yolg‘on hisobot berishni afzal ko‘ryapti, — dedi Ozoda Jo‘rayeva.
Shuningdek, ta’kidlandiki, soha raqamlashtirilayotganiga qaramay, ba’zi hududlardagi boshqaruv organlari aholi orasida naqd pul yig‘ish orqali “xufiyona iqtisodiyot”ga yo‘l qo‘ymoqda. Mas’ullar esa befarq. Elektron to‘lov tizimi ishlamaydi, aholi orasida yetarlicha targ‘ibot olib borilmagan. Yangidan o‘rnatilgan yuzlab liftlar davlat ro‘yxatidan o‘tkazilmagan. Vazir o‘rinbosari hududiy boshqarmalar va tizim tashkilotlarida inson resurslari bilan ishlash tizimini ham qattiq tanqid ostiga oldi. Ish yuki to‘g‘ri taqsimlanmagan, nazorat va adolat yo‘q. Ayrim rahbarlar esa lavozimni mas’uliyat emas, imtiyoz sifatida ko‘rmoqda.
Hududlarda ishlarni yetarli darajada tashkil etmagan, lavozim yo‘riqnomalarida belgilangan vazifalarni to‘liq ta’minlamagan hamda faoliyati davomida qator xato va kamchiliklarga yo‘l qo‘yganligi sababli 12 nafar hududiy boshqarma rahbari o‘rinbosarlari va mutaxassislari bilan tuzilgan mehnat shartnomalari tegishli tartibda bekor qilinishi, 20 nafardan ortig‘iga intizomiy chora ko‘rilishi qayd etildi.
— Kim bu sohani lavozim, imtiyoz yoki shaxsiy manfaat uchun deb o‘ylayotgan bo‘lsa — qattiq adashayapti. Bu joyga xalq va davlatga xizmat qiladiganlargina munosib, — dedi vazir o‘rinbosari.
Yig‘ilish yakunida hududiy boshqarmalarning taklif va mulohazalari tinglandi. Shuningdek, Korrupsiyaga qarshi kurashish agentligining mas’ul xodimi Jasur Fayziyev so‘zga chiqib, sohada ochiqlik va shaffoflikni oshirish, mazkur masalada tizim oldiga qo‘yilgan talablar hamda mavjud kamchiliklar yuzasidan ma’lumot berdi.