Qonunchilik palatasi deputatlari AKT rivojlantirish Respublika markazi faoliyati bilan tanishtirildi
2026-02-04 11:00:00 / Vazirlik yangiliklar
Bugun Qurilish va uy-joy kommunal xo‘jaligi vazirligida binolar va inshootlarning zilzilabardoshligi hamda seysmik xavfsizligini ta’minlashga qaratilgan qonun loyihasi muhokamasiga bag‘ishlangan seminar bo‘lib o‘tmoqda.
Unda Oliy Majlis Qonunchilik palatasi deputatlari ishtirok etmoqda.
Tadbir avvalida mehmonlar Axborot kommunikatsiya texnologiyalarini rivojlantirish Respublika markazi faoliyati bilan tanishtirildi. Ishtirokchilarga “Shaffof qurilish” milliy axborot tizimining imkoniyatlari keng namoyish etildi.
Qayd etilishicha, bugungi kunda mazkur tizim doirasida 24 ta davlat xizmati to‘liq raqamlashtirilgan bo‘lib, undan foydalanuvchilar soni 2,2 million nafarga yetgan. Xususan, litsenziyalash, ruxsatnoma berish hamda loyiha-smeta hujjatlarini kelishish jarayonlari inson omilisiz, to‘liq elektron shaklda amalga oshirilmoqda. Shuningdek, tizim Adliya vazirligi, Ichki ishlar vazirligi, Oliy sud va Kadastr agentligining axborot tizimlari bilan integratsiya qilingani natijasida ma’lumotlar almashinuvi tezlashgan va korrupsiyaviy xavf-xatarlar sezilarli darajada kamaytirilgan.
Shuningdek, vazirlikda joriy etilgan “open space” ish tizimi bilan ham tanishtirildi. Ushbu ish uslubi qaror qabul qilish jarayonlarining ochiqligini ta’minlash, tuzilmalar o‘rtasida samarali hamkorlikni yo‘lga qo‘yish, jamoaviy ishlash muhitini shakllantirish hamda xodimlarning shaxsiy mas’uliyatini oshirishga xizmat qilayotgani qayd etildi.