2026-yilda Qurilish va uy-joy kommunal xo‘jaligi vazirligi tomonidan sohada raqamlashtirish va shaffoflikni kuchaytirishga qaratilgan muhim yangiliklar amalga oshiriladi.

Joriy yilda 154 ta aholi punkti uchun shaharsozlik hujjatlari ishlab chiqiladi. “Shaffof qurilish” tizimida “Raqamli shaharsozlik kengashi” platformasi ishga tushirilib, arxitektura-shaharsozlik kengashlari faoliyati to‘liq raqamlashtiriladi. Fuqarolardan kelib tushayotgan murojaatlarni o‘qish, tahlil qilish va toifalash jarayonlariga sun’iy intellekt joriy etiladi.

Qurilish sohasida 158 ta texnik-normativ hujjat ishlab chiqiladi. “Qurilish resurslari milliy klassifikatori” elektron platformasida 206 mingdan ortiq qurilish resurslariga individual kodlar shakllantirilgan. Shuningdek, raqamli smeta moduli ishlab chiqilib, Nukus va Qarshi shaharlarida avtomatik shaharsozlik talablari mexanizmlari tajriba tariqasida joriy etiladi.

Qiymati 10 mlrd so‘mdan yuqori bo‘lgan obyektlar loyihalari “Shaffof qurilish” milliy axborot tizimi orqali ko‘rib chiqiladi. Loyihalash topshiriqlarini ishlab chiqish va kelishish jarayonlari elektron platforma orqali yagona formatga o‘tkaziladi.

2026-yilda aholi uy-joy sharoitlarini yaxshilash maqsadida 140 mingta xonadondan iborat ko‘p kvartirali uylar qurilishi rejalashtirilgan.

Barcha loyihalarning amalga oshirilishi “Shaffof qurilish” tizimi orqali doimiy monitoring qilinadi.

2026-yilda 25 ta qozonxona hamda 301 km issiqlik tarmoqlari quriladi va rekonstruksiya qilinadi, natijada 56 mingga yaqin xonadon joylashgan 1 200 ta ko‘p qavatli uy, shuningdek, 97 ta ijtimoiy va boshqa obyektlarda issiqlik ta’minoti yaxshilanadi.

 “Turar joy” milliy axborot tizimi bosqichma-bosqich ishga tushiriladi. Ushbu tizim orqali ko‘p kvartirali uylarning texnik holati, yer uchastkalari, energiya va suv iste’moli bo‘yicha ma’lumotlar yagona elektron bazada shakllantiriladi.