O‘zbekiston va Janubiy Koreya: qurilish materiallari va standartlashtirish sohasidagi hamkorlikning yangi bosqichi
2026-01-09 15:00:00 / Vazirlik yangiliklar
Qurilish va uy-joy kommunal xo‘jaligi vazirligi hamda Texnik me‘yorlash va standartlashtirish ilmiy-tadqiqot instituti mutasaddilari ishtirokida Koreya Respublikasining Yer, infratuzilma va transport vazirligi, Koreya Xalqaro pudratchilar assotsiatsiyasi hamda Korea IT Consulting tashkilotlari vakillaridan iborat delegatsiya bilan ishchi uchrashuv bo‘lib o‘tdi.
Unda Texnik me‘yorlash va standartlashtirish ilmiy-tadqiqot instituti direktori vazirlik va institut faoliyati to‘g‘risida qisqacha ma’lumot berdi. Shundan so‘ng Koreya delegatsiyasi vakillari tomonidan zamonaviy, innovatsion qurilish materiallarini O‘zbekiston hududida ishlab chiqarishni yo‘lga qo‘yish, shuningdek, mazkur mahsulotlarni xalqaro talablar asosida sinovdan o‘tkazish va standartlashtirish bo‘yicha takliflar taqdim etildi.
Koreya tomoni ishlab chiqarish jarayonlarida zamonaviy texnologiyalar va raqamli yechimlardan foydalanish, mahsulot sifatini nazorat qilish hamda sertifikatlashtirish tizimini joriy etish masalalariga alohida e’tibor qaratdi.
O‘zbekiston tomoni ushbu takliflar qurilish sohasida import o‘rnini bosuvchi mahsulotlar ishlab chiqarishni rivojlantirish, milliy standartlar bazasini takomillashtirish hamda xalqaro me’yorlar bilan uyg‘unlashtirish nuqtayi nazaridan muhim ahamiyatga egaligini ta’kidladi. Shu bilan birga yangi qurilish materiallarini normativ-texnik hujjatlar asosida baholash va ularni amaldagi standartlar tizimiga kiritish bo‘yicha Texnik me’yorlash va standartlashtirish ilmiy-tadqiqot institutining vakolatlari tushuntirildi.
Uchrashuv yakunida mazkur yo‘nalishda ikki tomonlama hamkorlikni davom ettirish, texnik masalalarni batafsil ishlab chiqish hamda keyingi bosqichda qo‘shma ishchi guruh tuzish va aniq takliflar paketini shakllantirish yuzasidan kelishib olindi.