O‘zbekiston Respublikasi Vazirlar Mahkamasining 2020-yil 9-noyabrdagi 699-son qaroriga asosan, 10 ga yaqin vazirlik va idoralar tomonidan taqdim etilgan ma’lumotlar asosida reyting avtomatik tarzda hisoblanadi. “Shaffof qurilish” ushbu ma’lumotlarni o‘zgartira olmaydi — tizim faqat ularni yig‘adi va reyting.mc.uz saytida ochiq holatda namoyish etadi.

Masalan, Kambag‘allikni qisqartirish va bandlik vazirligi tashkilot tomonidan ishga olingan xodimlar haqidagi ma’lumotlarni taqdim etsa, Soliq qo‘mitasi to‘langan soliqlar, ishchilarga hisoblangan ish haqi, sof tushum haqidagi ma’lumotlarni beradi. Yo‘l harakati xavfsizligi xizmati, Tog‘-kon sanoati va geologiya sohasini nazorat qilish inspeksiyasi hamda Agrosanoat majmui ustidan nazorat qilish inspeksiyasi esa yuk ko‘tarish, yuk tashish va umuman qurilishda foydalaniladigan texnikalar haqidagi ma’lumotlarni taqdim etadi. Shu ma’lumotlar asosida reyting shakllantiriladi.

Taqdim etilgan ma’lumotlarning haqqoniyligi uchun tegishli vazirlik va idoralarning birinchi rahbarlari mas’ul etib belgilangan. Mezon talablariga amal qilish — reytingda yuqori o‘rinlarni egallashning asosiy garovidir. Masalan, agar quruvchi xodimlarni belgilangan qoidalarga muvofiq ishga olsa, lavozim kodlarini to‘g‘ri kiritsa va ularga eng kam oylik ish haqidan kam bo‘lmagan maosh to‘lasa, tashkilot yuqori ball oladi. Aksincha, mezonlarga rioya qilinmasa, reyting pasayadi.

Eng muhimi, reyting ochiq va shaffof. Har bir foydalanuvchi reyting.mc.uz orqali tashkilotning nechanchi o‘rinda ekanini hamda nima sababdan yuqori yoki past ball olganini ko‘rishi mumkin.