Ta’kidlash kerakki, joriy yilda 53 ta shahar va shaharchalarning bosh rejalari hamda 108 ta qishloq aholi punktlarining shaharsozlik hujjatlari ishlab chiqildi. Shuningdek, 11 ta shaharning bosh rejasi hamda 22 ta turizm hudud master rejalarini ishlab chiqish jarayonlari yakunlanmoqda. 

   Aholi hududlarining bosh rejalarini Davlat shaharsozlik geoaxborot tizimiga “raqamli egizaklar” shaklida joylashtirish bo‘yicha tegishli platforma ishga tushirildi va unga 567 ta shaharsozlik hujjatlari yuklandi.

   Vazirlikning hududiy boshqarma va bo‘limlar tomonidan 6 turdagi davlat xizmatlarini ko‘rsatish bo‘yicha jami 353 085 ta obyektga oid arizalar ko‘rib chiqildi. Shuningdek, texnik tartibga solish tizimini takomillashtirish bo‘yicha  160 ta texnik-normativ hujjatlar ishlab chiqildi.

  Joriy yil dasturi doirasida respublika bo‘yicha 135 mingta xonadondan iborat uy-joylar qurilishi belgilangan. Unga ko‘ra, 56 ta “Yangi O‘zbekiston” massivlarida 28 219 ta xonadonli 543 ta uy, talab yuqori bo‘lgan hududlarda esa 106 781 ta xonadondan iborat 2 018 ta uylarni qurib foydalanishga topshirish ishlari qizg‘in davom etmoqda. 

   Investitsiya dasturi doirasida joriy yilda 352 ta maktab, 165 ta bog‘cha va 2 ta ijod va ixtisoslashgan maktablarda qurilish-ta’mirlash ishlari yakunlandi. 

   Shuningdek, mazkur ta’lim muassasalarining hududiy joylashuvi va sharoitiga qarab, 497 ta obyektga isitish tizimi, markazlashgan kanalizatsiyaga ulanmagan 464 ta obyektga oqova suv tizimi hamda 304 ta binoga nogironligi bo‘lgan shaxslar uchun lift qurilmalari o‘rnatilmoqda.

   Qurilish sohasida faoliyatni amalga oshirish uchun loyiha va pudrat tashkilotlariga 415 ta litsenziya va 25 ta akkreditatsiya guvohnomalari berildi.

   “Shaffof qurilish” milliy axborot tizimida, “Zilzilbardosh uy”, “Ulush kiritish asosida uy-joy qurish 2.0”, Xavfsiz lift,  Ko‘p kvartirali uyni boshqaruvchi organlar reyestri, Kommunal xizmatlar uchun to‘lovlarni yagona shaxsiy hisob varaq orqali amalga oshirish hamda Mening hududim kabi platformalar ishlab chiqildi.

   Shuningdek, o‘tib borayotgan yilda “Shaffof qurilish” tizimi orqali qariyb 26 mingta obyekt loyihasi ekspertizadan o‘tkazildi va loyihalar smetasidan 9,7 trln.so‘m iqtisod qilindi. 

   “Shaffof qurilish” platformasi orqali 17 759 ta obyektga loyiha va pudrat tashkilotlarini aniqlash bo‘yicha onlayn elektron tender savdolari o‘tkazildi, natijada 823 mlrd.so‘m mablag‘ iqtisod qilindi.

   Bugungi kunda “Reyting elektron platformasi”ga 18,6 mingta qurilish-pudrat tashkilotlari hamda 2 mingta loyiha tashkilotlari kiritildi. Qurilish sohasida 168 ming yangi ish o‘rinlari yaratildi.

   Qurilishda texnik me’yorlash va standartlashtirish bo‘yicha ham muayyan natijalarga erishildi. Xususan, 160 ta normativ va 114 ta milliy standart ishlab chiqildi. 114 ta standartning xalqaro va Jahon savdo tashkiloti talablariga mosligi tahlil qilindi. 

  Ichimlik suv ta’minoti va oqova suv xizmati sohasida ham Davlat ijtimoiy buyurtmalari asosida 9 ta og‘ir sharoitdagi olis qishloqda 231 km tarmoq tortildi, 14 ta inshootda esa qurilish-montaj ishlari yakunlandi.

   26 ta aholi yashash punktlarida suvni chuchuklashtiruvchi uskunalarni o‘rnatish va jihozlash ishlari amalga oshirildi.
Yaponiya kompaniyasining grant mablag‘lari evaziga 64 ta mahallada 5 ta ichimlik suv inshooti qurildi, qariyb 100 km tarmoq tortildi.
Issiqlik ta’minoti sohasida joriy yilda 60 ta loyihalar doirasida 142 km issiqlik tarmoqlari tortilib, 62 ta isitish qozonlari o‘rnatilgan.

Jumladan:

• Investitsiya dasturi doirasida 20 ta loyihalar doirasida 83 km issiqlik tarmoqlari tortilib, 19 ta isitish qozonlari o‘rnatilgan.
• “Yangi O‘zbekiston” massivlarida 40 ta loyihalar doirasida 59 km issiqlik tarmoqlari tortilib, 43 ta isitish qozonlari o‘rnatilgan.
• Shuningdek, tizimni 2025/2026 yillar kuz-qish mavsumida barqaror ishlashga tayyorlash maqsadida 53 ta qozon va 93,3 km ga yaqin issiqlik tarmoqlarini mukammal hamda 598 ta qozon va 519,2 km issiqlik tarmoqlarini joriy ta’mirlash ishlari amalga oshirildi.

   Bundan tashqari, issiqlik ta’minoti korxonalarida tunu-kun ishlovchi “dispetcherlik xizmati” faoliyati yanada kuchaytirilib, 500 ga yaqin xodim va 125 ta maxsus texnikalardan iborat 104 ta tezkor avariya-tiklash guruhlari faoliyati yo‘lga qo‘yildi.

   Mavsum davomida havo haroratining keskin pasayish holatlari kuzatilganda iste’molchilarga belgilangan parametrda issiqlik energiyasi yetkazib berish hamda issiqlik energiyasini barqaror yetkazib berilishini ta’minlash maqsadida, 26 ming 500 tonna mazut hamda 16 ming 200 tonna ko‘mir, 8,4 km issiqlik tarmoqlari, 411 dan ortiq zadvijka, 3 379 kg elektrod va 35 ta dizel generator zaxirasi yaratildi.

   Ko‘p kvartirali uylarni 2025-2026 yillarda kuz-qish mavsumiga tayyorgarlik dasturi doirasida boshqarish organlarining o‘z mablag‘lari hisobidan 9 812 ta uylarning 2 043 ta tom qismi, 7 635 ta kirish yo‘laklari, 1 731 ta yerto‘lasi, 964 ta ichki muhandislik tarmoqlari, 778 ta fasadi, 55 774 ta shitlari ta’mirlandi. Shuningdek, 1 513 ta kodli qulfli temir eshik, 22,6 ming kv.m framuga oyna romlari va 69 507 ta energiya tejamkor chiroqlar o‘rnatildi. 

   Shuningdek, 1 062 ta ko‘p kvartirali uylarning tashqi fasad qismi energiya tejovchi materiallar bilan qoplandi. Hukumat qarori bilan tasdiqlangan dastur asosida ko‘p qavatli uylardagi 401 ta lift yangilandi.

   Boshqarish organlarida tashkil etilgan avariya-dispetcherlik xizmatlari faoliyati 24 soatlik kuchaytirilgan rejimga o‘tkazilib, ushbu xizmatlarga 
4 ming nafardan ortiq xodim va 24 mingdan ortiq zarur texnikalar jalb qilindi.

   Jumladan, 405 ta avtotransport, 775 ta mototransport, 145 ta maxsus transport, 1 742 ta avariyani bartaraf etish jamlanmasi va 20 mingdan ko‘proq xar xil turdagi asbob-uskunalar jalb etildi. 

   Shu bilan birga, avariya holatlarini tezkorlik bilan bartaraf etish maqsadida 210 ming kv.m shifer va folgaizol, 5 tonna karbit va elektrod,  36 mingta zadvijka va ventil, 145 ming pogonometr har xil turdagi quvurlar, 23 ming kv.m. oyna va romlar va 1000 tonna qum-tuz aralashmasi zahirasi yaratildi.

   “Yashil makon” dasturi doirasida bahorda respublika bo‘yicha ko‘p kvartirali uylar hududlarida jami 234 ming tup daraxt va buta ko‘chatlari hamda 213 ming uzum ko‘chatlari ekildi.

   Ushbu ma’lumotlar o‘tib borayotgan 2025-yil hisobot davriga oid tahlillar edi.