Xalqaro suv hamkorligi va suv qonunchiligini takomillashtirishga bag‘ishlangan konferensiya bo’lib o’tmoqda
2025-11-17 18:00:00 / Vazirlik yangiliklar
Tadbirda daxldor davlat idoralari, xalqaro tashkilotlar va ekspertlar ishtirok etib, suv resurslarini boshqarishdagi asosiy islohotlar, innovatsiyalar va zamonaviy yondashuvlarni muhokama qilmoqdalar.
O‘zbekistonning yangi Suv kodeksi taqdimoti - konferensiyaning asosiy mavzusiga aylandi. Yangi Kodeks barqaror suvdan foydalanish, sohada shaffoflikni oshirish va ekotizimlarni himoya qilishni nazarda tutadi.
Tadbir davomida ishtirokchilar suv resurslarini boshqarishda innovatsion texnologiyalar va raqamli yechimlarni joriy etish imkoniyatlarini muhokama qildilar. Sun’iy intellekt, dronlar va IoT qurilmalari yordamida suv taqsimoti va monitoringini samarali boshqarish bo‘yicha xalqaro tajriba, ayniqsa, tahlillar markazida bo’ldi.
Shuningdek, iqlim o‘zgarishining suv resurslariga ta’siri, barqaror rivojlanish va ekotizimlarni himoya qilish masalalariga ham alohida e’tibor qaratildi.
Tadbir ishtirokchilari xalqaro hamkorlikni rivojlantirish, tajriba almashish va raqamli hamda iqtisodiy instrumentlarni joriy etish orqali suv xavfsizligini ta’minlash yo‘llarini muhokama qildilar. Bu esa nafaqat O‘zbekiston, balki mintaqa suv resurslarini samarali boshqarish borasida muhim qadam hisoblanadi.
Konferensiya doirasida “Suv resurslari, suv ta’minoti va sanitariya” bo‘yicha Ishchi guruhining 5-yig‘ilishi bo‘lib o‘tmoqda.
Tadbirda Qurilish va uy-joy kommunal xo‘jaligi vaziri o‘rinbosari Ozoda Jo‘rayeva sohada amalga oshirilayotgan islohotlar, xalqaro hamkorlik va suvdan oqilona foydalanish bo‘yicha rejalar xususida nutq soʻzladi.
- Davlatimiz rahbarining “Markaziy Osiyo yangi davr ostonasida” nomli dasturiy maqolalarida ham Markaziy Osiyo davlatlari hamkorlikda iqlim o‘zgarishiga moslashish, transchegaraviy suv resurslarini asrash bo‘yicha birgalikdagi sa’y-harakatlarga alohida e’tibor qaratishlari lozimligi qayd etildi.
Shu bilan birga, hurmatli yurtboshimiz 7 ta asosiy tashabbuslarni ilgari surib, ustuvor ravishda iqlim va suv masalalariga alohida e’tibor qaratdilar.
Xususan, 2026-2036-yillarni “Markaziy Osiyoda suvdan oqilona foydalanish bo‘yicha amaliy harakatlar o‘n yilligi” deb e’lon qilish, shuningdek, suv sohasida Kompetensiyalar mintaqaviy markazini tashkil etishni taklif etdilar. Bu suv ta’minoti sohasini yaxshilashdagi muhim qadam, - deya ta’kidladi vazir o’rinbosari.
Ta’kidlanganidek, O‘zbekistonda ilk bor qabul qilingan Suv kodeksi aholini kafolatlangan miqdorda va sifatli suv bilan ta’minlash, davlat suv kadastri ma’lumotlarini yuritish kabi asosiy masalalarni belgilaydi.
Shuningdek, vazirlik tomonidan amalga oshirilgan ishlar natijasida 9 ta mahallada 40 ming aholi markazlashgan ichimlik suvi bilan ta’minlandi. Shu bilan birga oqova suv standartlariga muvofiq, suv chiqarish uchun kompensatsiya to‘lovlari 20 baravarga oshirildi.
Ozoda Jo’rayeva kelgusidagi ustuvor vazifalarga ham alohida to’xtaldi:
-xizmat ko‘rsatishda transformatsiya va raqamlashtirish jarayonlarini kengaytirish;
- suv hisob va kadastrni yuritishda qat’iy iqtisodiy mexanizmlarni joriy etish;
- davlat-xususiy sheriklikni rivojlantirish va tarif siyosatini isloh qilish;
- sun’iy intellektni joriy etish orqali suv yo‘qotilishini minimal darajaga tushirish va sohaga samarali boshqaruvni ta’minlash shular jumlasidandir.
Bu tadbir O‘zbekistonning suv resurslarini barqaror boshqarish va aholini sifatli ichimlik suvi bilan ta’minlash yo‘lida muhim qadam bo‘lib, sohada xalqaro hamkorlikni yanada mustahkamlash imkonini yaratmoqda.