O‘zbekiston Respublikasi Oliy ta’lim, fan va innovatsiyalar vazirligi huzuridagi Innovatsion rivojlanish agentligi

Xalqaro Forumni O‘zbekiston Respublikasi Oliy taʼlim, fan va innovatsiyalar vaziri Qo‘ng‘irotboy Sharipov ochib berdi hamda bugungi kunda ayollarning ilm-fanda yanada yuksalayotgani, ularga davlat tomonidan berilayotgan keng imkoniyatlar natijasi ekanini taʼkidladi.

Mazkur forumning asosiy maqsadi – ilm-fan, innovatsiyalar va biznesda ayollarning roli va salmoqli hissasini ko‘rsatish, bu borada erishilgan yutuqlarni tahlil qilish, mavjud muammolarni muhokama qilish hamda ularni hal etish yo‘llarini belgilashdan iborat bo‘ldi. Shuningdek, tadbir gender tengligini taʼminlash, ayollar tadbirkorligini rivojlantirish va innovatsion jarayonlarda xotin-qizlarning ishtirokini kengaytirish bo‘yicha xalqaro hamkorlikni mustahkamlash uchun muhim platforma vazifasini o‘tadi.

Forum doirasida qator muhim masalalar ko‘rib chiqildi. Xususan, maʼruzachilar ayollarning ilm-fan va biznesdagi ishtiroki orqali iqtisodiy o‘sish va barqaror rivojlanishga qo‘shgan hissasi, innovatsiyalar jarayonida ayollarni qo‘llab-quvvatlashning samarali usullari, taʼlim va malaka oshirish orqali imkoniyatlarni kengaytirish yo‘llariga to‘xtaldilar. Shu bilan birga, xotin-qizlarning raqobatbardoshligini oshirish, ularning startaplar va tadbirkorlik loyihalarida ishtirokini kuchaytirish, moliyaviy resurslarga kirish imkoniyatlarini kengaytirish masalalari alohida muhokama qilindi.

Shuningdek, forumda xorijlik ayol ekspertlar tomonidan O‘zbekistonda xotin-qizlar tadbirkorligi va ilm-faniga berilayotgan eʼtibor haqida iliq fikrlar bildirildi. Yevropadagi Horizon Europe dasturida ayollarga erkaklar bilan teng imkoniyatlar taqdim etilgani bo‘yicha taqdimotlar qilindi. Ayniqsa, ushbu dasturda o‘zbekistonlik ayol olimalarning faol ishtiroki alohida taʼkidlandi. Ular biotexnologiya, tibbiyot, iqlim o‘zgarishi va raqamli texnologiyalar sohasida xalqaro loyihalarda hamkorlik qilib, mamlakatning ilmiy salohiyatini namoyish etmoqdalar. Bu nafaqat O‘zbekiston ayol olimalarining xalqaro nufuzini oshirish, balki milliy ilm-fan maktablarini global ilmiy hamjamiyatga integratsiya qilishga xizmat qilmoqda. Xalqaro ekspertlar gender tenglik sohasidagi ilg‘or tajribalar bilan o‘rtoqlashdilar va O‘zbekistonda amalga oshirilayotgan islohotlarni yuqori baholadilar. Forum yakunlari mamlakatda xotin-qizlarning ilm-fan va biznes sohalaridagi ishtirokini yanada kengaytirish, gender tenglikni taʼminlash hamda yangi tashabbuslarni rivojlantirish uchun mustahkam poydevor yaratdi.