Sirdaryo viloyatida O‘zbekiston Respublikasi Prezidentining 2026-yil 4-apreldagi PF–54-son Farmoni ijrosini ta’minlash, ilm-fan va innovatsion faoliyatni rivojlantirish hamda yangi ishlanmalar asosida ishlab chiqarishni yo‘lga qo‘yish masalalariga bag‘ishlangan seminar bo‘lib o‘tdi.

Toshkent kimyo-texnologiya instituti Yangiyer filialida tashkil etilgan mazkur tadbirda Innovatsion rivojlanish agentligi mutaxassislari, oliy ta’lim muassasalari professor-o‘qituvchilari, ilmiy izlanuvchilar hamda tadbirkorlar ishtirok etdi.

Seminarda ta’kidlanganidek, ushbu farmonga muvofiq endilikda oliy ta’lim va ilmiy muassasalar muassisligida yangi ishlanmalarga asoslangan “spin-off” korxonalarni tashkil etish imkoniyati yaratildi. Bu esa ilmiy tadqiqot natijalarini bevosita ishlab chiqarishga joriy etish, innovatsion mahsulotlar yaratish hamda ularni tijoratlashtirishda muhim bosqich hisoblanadi.

Tadbir davomida so‘zga chiqqan mutaxassislar “spin-off” korxonalar tashkil etishning huquqiy asoslari, ularni moliyalashtirish manbalari, xususan, venchur investitsiyalarni jalb etish imkoniyatlari hamda bunday korxonalar faoliyatini samarali yo‘lga qo‘yish mexanizmlarini batafsil tushuntirib berdilar.

Shuningdek, oliy ta’lim muassasalarida yaratilayotgan ilmiy ishlanmalarni ishlab chiqarish bilan integratsiya qilish, innovatsion g‘oyalarni tijoratlashtirish va ularni iqtisodiyot tarmoqlariga joriy etish orqali qo‘shimcha qiymat yaratish masalalariga alohida e’tibor qaratildi.

Seminar yakunida ishtirokchilar tomonidan “spin-off” korxonalar faoliyatini yo‘lga qo‘yish yuzasidan taklif va mulohazalar bildirildi. Kelgusida ilm-fan va ishlab chiqarish o‘rtasidagi uzviy aloqalarni yanada mustahkamlash zarurligi qayd etildi.

Mazkur seminar hududda innovatsion ekotizimni rivojlantirish, ilmiy ishlanmalarni iqtisodiy samaraga aylantirish hamda zamonaviy tadbirkorlik muhitini shakllantirishda muhim ahamiyat kasb etadi.