MDH mamlakatlari o‘rtasida ilmiy-texnika va innovatsion hamkorlik masalalari muhokama qilindi
2026-04-28 19:35:00 / Yangiliklar
Joriy yilning 28-aprel kuni Rossiya Federatsiyasi Savdo-sanoat palatasi Kongress markazida Mustaqil Davlatlar Hamdo‘stligiga a’zo davlatlarning ilmiy-texnika va innovatsiyalar sohasidagi hamkorligi bo‘yicha Davlatlararo kengashning 37-yig‘ilishi bo‘lib o‘tdi.
Unda MDH Ijroiya qo‘mitasi, Rossiya Federatsiyasi Prezidenti administratsiyasi, tegishli vazirlik va idoralar, rivojlanish institutlari, ilmiy tashkilotlar va ishbilarmon doiralar vakillari, shuningdek, Innovatsion rivojlanish agentligi xodimlaridan iborat ishchi guruh ishtirok etdi.
Yig‘ilish davomida O‘zbekiston tomonidan ilgari surilgan startaplarni rivojlantirishga qaratilgan MDH venchur platformasi konsepsiyasi loyihasi muhokama qilindi.
Mazkur loyiha O‘zbekiston Respublikasi Prezidenti Shavkat Mirziyoyev tomonidan 2025-yilda Tojikiston Respublikasida o‘tkazilgan MDH sammitida ilgari surilgan tashabbus asosida ishlab chiqilgan bo‘lib, u Hamdo‘stlikka a’zo davlatlar o‘rtasida startap loyihalarni qo‘llab-quvvatlash, venchur moliyalashtirish mexanizmlarini rivojlantirish hamda o‘zaro hamkorlikni mustahkamlashga xizmat qiladi.
Tadbir yakunida tomonlar mazkur platforma konsepsiyasini qabul qilish hamda uni amaliyotga joriy etish bo‘yicha istiqboldagi aniq vazifalarni belgilab oldilar.