Hududiy innovatsion rivojlanish bo‘linmalari uchun stajirovka boshlandi
2026-02-09 20:35:00 / Yangiliklar
Innovatsion rivojlanish agentligi tomonidan tashkil etilgan stajirovkada Qoraqalpog‘iston Respublikasi va viloyatlar hududiy innovatsion rivojlanish bo‘linmalari xodimlari ishtirok etmoqdalar.
Kasbiy bilim va ko‘nikmalarni mustahkamlash, amaliy faoliyatni zamonaviy talablar asosida takomillashtirish maqsadida tashkil etilgan mashg‘ulotlar uchun maxsus o‘quv reja ishlab chiqilgan bo‘lib, jarayonlar 5 kun davom etadi.
O‘quv dasturiga muvofiq, ishtirokchilar Innovatsion rivojlanish agentligining asosiy faoliyat yo‘nalishlari bo‘yicha bilimlarini mustahkamlaydilar. Jumladan, tanlovlarni tashkil etish va o‘tkazish tartiblari, elektron platformalar orqali arizalar qabul qilish mexanizmlari, ilmiy, amaliy va innovatsion loyihalarni moliyalashtirish jarayonlari yuzasidan nazariy va amaliy mashg‘ulotlar o‘tkaziladi.
Shu bilan birga, mashg‘ulotlar doirasida jamoatchilik bilan aloqalarni kuchaytirish, fuqarolar va tadbirkorlardan kelib tushayotgan murojaatlarga o‘z vaqtida va sifatli javob berish, shuningdek, ijro intizomini ta’minlash masalalariga ham alohida e’tibor qaratiladi. Ushbu yo‘nalishlar bo‘yicha ishtirokchilarga amaliy tavsiyalar berilib, real holatlar asosida mashg‘ulotlar tashkil etiladi.
O‘quv-amaliy mashg‘ulotlar yakuniga ko'ra, ishtirokchilarning bilim va malakasi yanada oshishi, bu esa hududlarda innovatsion faoliyatni samarali tashkil etish, loyihalarni sifatli amalga oshirish hamda aholiga ko‘rsatilayotgan xizmatlar darajasini yuksaltirishga xizmat qilishi kutilmoqda.